Онлайн
Տուրիզմի համաշխարհային օրվա առթիվ Երևանի քաղաքապետարանի տուրիզմի բաժնի նախաձեռնությամբ այսօր վաղ առավոտից «Զվարթնոց» օդանավակայանում մայրաքաղաք ժամանող հյուրերին անակնկալ խորհրդանշական նվերներ է մատուցվել: Քաղաքապետարանաից հայտնում են, որ զբոսաշրջիկներին տրվել են Երևանի պաշտոնական ուղեգրքեր, «Երևան Սիթի Տուր» քաղաքային պաշտոնական երթուղու և Երևանի պատմության թանգարանի անվճար տոմսեր, մայրաքաղաքի քարտեզներ, զբոսաշրջային վայրերից օգտվելու զեղչի հավաստագրեր և այլն:
«Նմանատիպ միջոցառումներն ընդգծում են մեր քաղաքի հյուրընկալությունը և ջերմություն են փոխանցում մայրաքաղաքի հյուրերին: Ակցիան նպատակ ունի զբոսաշրջիկներին հենց օդանավակայանից ուղղորդել մայրաքաղաքի առավել հետաքրքրաշարժ զբոսաշրջային վայրեր և իրազեկել մշակութային հաստատությունների, հուշարձանների, ինչպես նաև քաղաքում գործող առավել գրավիչ ծառայությունների մասին», - նշել է Երևանի քաղաքապետարանի աշխատակազմի տուրիզմի բաժնի պետ Գևորգ Օրբելյանը:
Քաղաքապետարանից նշում են, որ նախաձեռնությունն իրականացվել է Երևանի քաղաքապետարան - մասնավոր հատված համագործակցությամբ: Նախաձեռնությանն աջակցել են «Երևան քարտ», «Արմենիա Փաս» կազմակերպությունները, «Տուրինֆո» զբոսաշրջային ամսագիրը:
Հավելենք նաև, որ Տուրիզմի համաշխարհային օրվա առթիվ քաղաքապետ Տարոն Մարգարյանը հանդես է եկել շնորհավորական ուղերձով, որում նշված է.
«Ժամանակակից աշխարհում զբոսաշրջությունը քաղաքային տնտեսության զարգացման կարևոր բաղադրիչներից մեկն է, և ուրախալի է, որ տարեցտարի Երևանն ավելի ճանաչված, սիրված ու նախընտրելի ուղղություն է դառնում միջազգային հարթակներում, ինչի մասին է վկայում նաև Երևան այցելող զբոսաշրջիկների թվի աճը: Այս ոլորտում վերջին տարիներին գրանցված հաջողությունների շարքում առանձնակի ուշադրության է արժանի նաև այն հանգամանքը, որ Հայաստանի մայրաքաղաքը միաժամանակ հայտնվեց հեղինակավոր մի քանի վարկանիշային աղյուսակներում՝ գերազանցելով տարածաշրջանային և եվրոպական զարգացած մի շարք քաղաքների, այդպիսով նաև գրավելով միջազգային հանրության, զբոսաշրջիկների և ներդրողների ուշադրությունը:
Սրանք, անշուշտ, կարևոր ձեռքբերումներ են, որոնց կայուն պահպանման և զբոսաշրջային հոսքերի ավելացման ու ոլորտի զարգացման նպատակով մենք շարունակելու ենք զարգացնել համապատասխան ենթակառուցվածքներն ու անել առավելագույնը, որպեսզի Երևանը դարձնենք էլ ավելի հարմարավետ, գեղեցիկ ու գրավիչ:
Մյուս տարի մենք նշելու ենք համայն հայության մայրաքաղաք Երևանի հիմնադրման 2800-ամյակը, ինչը լավ առիթ է մեր սիրելի քաղաքն իր ողջ հմայքով ու առավելություններով աշխարհին պատշաճ ներկայացնելու համար: Վստա՛հ եմ, որ մեր համատեղ աշխատանքի և արդյունավետ փոխգործակցության արդյունքում մենք կարո՛ղ ենք արժանիորեն ներկայանալ աշխարհին՝ գրանցելով նորանոր հաջողություններ մայրաքաղաքի զբոսաշրջային գրավչության բարձրացման և ոլորտի զարգացման ուղղությամբ:
Մեկ անգամ ևս շնորհավորելով ոլորտի բոլոր ներկայացուցիչներին` մաղթում եմ անսպառ ուժ և եռանդ՝ բեղմնավոր գործունեություն ծավալելու և հետաքրքիր ծրագրեր կյանքի կոչելու համար»:
