2017 թվականին անհատական կենսաթոշակ կստանան Հայաստանի 2 նախկին նախագահներն ու 95 նախկին պատգամավորներ: Այս մասին նոյեմբերի 2-ին Ազգային ժողովում 2017թ. պետբյուջեի նախագծի խորհրդարանական լսումների ժամանակ հայտնել է աշխատանքի եւ սոցիալական հարցերի նախարար Արտեմ Ասատրյանը:
Բացի այդ, կենսաթոշակ կստանան 63 նախկին դատավորներ, Սահմանադրական դատարանի 4 նախկին անդամներ, 401 նախկին դատախազներ, 18 այլ բարձրաստիճան պաշտոնատար անձինք: Անհատական կենսաթոշակի բազան 14 հազար դրամն է, որին մասնագիտական ստաժի յուրաքանչյուր տարվա համար ավելանում է 5 հազարական դրամ:
Հիշեցնենք, որ 2015 թվականի մարտին ուժի մեջ մտած օրենքի փոփոխությունների համաձայն, Հայաստանի նախկին նախագահների անհատական կենսաթոշակը կազմում է գործող աշխատավարձի 70%-ը (բացառությամբ տապալված նախագահների):
Այսպիսով, երկու նախկին նախագահների՝ Լեւոն Տեր-Պետրոսյանի եւ Ռոբերտ Քոչարյանի կենսաթոշակները կկազմեն 924 հազար դրամ (շուրջ 1930 դոլար):
2017 թվականին անհատական կենսաթոշակ կստանա 623 անձ՝ 2016 թվականի 625-ի փոխարեն: Նրանց կենսաթոշակի միջին չափը կկազմի 352.100 դրամ (շուրջ 740 դոլար)՝ 2016 թվականի 363.200-ի փոխարեն: