Հանրային ծառայությունները կարգավորող հանձնաժողովն այսօրվա նիստում քննարկելով «Վեոլիա ջուր» ՓԲԸ կողմից խմելու ջրի մատակարարման և ջրահեռացման (կողտաջրերի մաքրման) ծառայությունների մատուցման սակագները սահմանելու և ՀՀ Հանրային ծառայությունները կարգավորող հանձնաժողովի 2016 թ. դեկտեմբերի 9-Ի №398Ն որոշումն ուժը կորցրած ճանաչելու մասին հարցը՝ որոշում է կայացրել սպառողների համար հունվարի 1-ից խմելու ջրի մատակարարման և ջրահեռացման սակագինը սահմանել 191․4 դրամ՝ մեկ խորանարդ մետրի դիմաց:
Նշենք, որ «Վեոլիա ջուր»-ը օգոստոսին հանձնաժողով ներկայացրած հայտում առաջարկել էր ջրի սակագինը մեկ խ/մ.-ի դիմաց բարձրացնել 14.3 դրամով՝ սահմանելով 194.3 դրամ սակագին, հանձնաժողովը, սակայն քննարկման արդյունքում խմելաջրի թանկացման հայտը բավարարեց 10.4 դրամի սահմանում:
Հիշեցնենք, ներկայում խմելու ջրի մատակարարման և ջրահեռացման համար սպառողները վճարում են 180 դրամ՝ մեկ խ/մ.-ի դիմաց:
Հանրային ծառայությունները կարգավորող հանձնաժողովի նախորդ տարեվերջի որոշմամբ՝ հանրապետության ջրային համակարգի վարձակալության արտոնագիրը 15 տարով հանձնվեց «Վեոլիա ջուր» ընկերությանը, հաստատվեց ջրամատակարարման և ջրահեռացման ծառայությունների մատուցման նոր միասնական սակագին։