Ֆրանսիայում նախօրեին կայացած նախագահական ընտրությունների երկրորդ փուլի նախնական արդյունքներով հաղթանակ է տարել թեկնածուներից Էմանուել Մակրոնը:
Նախագահի պաշտոնի համար պայքարում էին արմատական «Ազգային ճակատի» առաջնորդ Մարին Լը Պենը, և «Հառաջ» շարժման ղեկավար, էկոնոմիկայի նախկին նախարար Էմանուել Մակրոնը, ով առաջին փուլում ստացել էր ձայների 24 %-ը:
Երկրորդ փուլում, դեռեւս նախնական տվյալներով, Մարին Լը Պենին կողմ է քվերակել ընտրողների մոտ 35, Մակրոնին՝ ավելի քան 65 տոկոսը։ Վերջնական արդյունքները կհայտարարվեն մայիսի 11-ին։
Երեկ ուշ երեկոյան Մարին Լը Պենը զանգահարել ու շնորհավորել է 39-ամյա Մակրոնին՝ ընտրվելու կապակցությամբ։
Ֆրանսիայի պատմության մեջ Էմանուել Մակրոնն ամենաերիտասարդ նախագահն է։
ՀՀ նախագահ Սերժ Սարգսյանը հանդես է եկել Ֆրանսիայի Հանրապետության նորընտիր Նախագահին ուղղված շնորհավորական ուղերձով, որում մասնավորապես ասված է.
«Մեծարգո՛ պարոն Նախագահ,
Ջերմորեն շնորհավորում եմ Ձեզ Ֆրանսիայի Հանրապետության Նախագահի ընտրություններում համոզիչ հաղթանակի և երկրի ղեկավարի բարձրագույն պաշտոնում ընտրվելու կապակցությամբ։
Համոզված եմ, որ Ձեր պաշտոնավարության ընթացքում հայ-ֆրանսիական դարավոր բարեկամության վրա խարսխված՝ մեր երկրների միջև առանձնաշնորհյալ հարաբերությունները, բարձր մակարդակի քաղաքական սերտ երկխոսությունը, տնտեսական բազմոլորտ համագործակցությունը և մշակութային գործուն կապերը կշարունակեն առավել զարգանալ և խորանալ:
Հայաստանը բարձր է գնահատում Ֆրանսիայի կարևոր և շարունակական ջանքերը Մինսկի խմբի համանախագահող մյուս երկրների՝ Միացյալ Նահանգների և Ռուսաստանի հետ միասին՝ ուղղված Լեռնային Ղարաբաղի հակամարտության խաղաղ կարգավորմանը և մեր տարածաշրջանում տևական խաղաղության հաստատմանը։
Մեծապես կարևորում եմ Ֆրանսիայի աջակցությունը եվրոպական ընտանիքին Հայաստանի մերձեցմանը, ինչպես նաև միջազգային ասպարեզում, այդ թվում՝ Ֆրանկոֆոնիայի միջազգային կազմակերպության շրջանակներում, մեր երկրների միջև հաստատված սերտ համագործակցությանը:
Վերստին Ձեզ հղելով իմ անկեղծ շնորհավորանքը՝ մաղթում եմ հաջողություններ և ձեռքբերումներ Ձեր բարձր առաքելության մեջ՝ ի նպաստ բարեկամ Ֆրանսիայի առաջընթացի և բարօրության:
Ընդունեք խնդրեմ, Ձերդ Գերազանցություն, խորին հարգանքներիս հավաստիքը»: