Онлайн

Գորիսում աղիքային վարակ` դպրոցական սնունդից

2017-09-21 16:16 , Общество, 161

Գորիսում աղիքային վարակ` դպրոցական սնունդից

Գորիսի թիվ 3 դպրոցի 1-4-րդ դասարանների աշակերտների շրջանում սեպտեմբերի 14-ից արձանագրված բռնկման արդյունքում Գորիսի բժշկական կենտրոն է դիմել միջին ծանրության 27 հիվանդ՝ «աղիքային վարակ» նախնական ախտորոշմամբ։ Հիվանդներն ունեցել են միանման գանգատներ՝ լուծ, այդ թվում՝ արյունային, բարձր ջերմություն, սրտխառնոց, փսխում: Բացի այդ, բակային համայցերի արդյունքում հայտնաբերվել է ևս 11 հիվանդ, որոնք ստանում են ամբուլատոր բուժում և նրանց վիճակը գնահատվում է թեթև:

Այդ մասին հայնում են ՀՀ առողջապահության նախարարությունից՝ նշելով, որ 27 հիվանդից 21-ի, դպրոցի սննդի հատվածի 3 աշխատակիցներից 2-ի, 14 կոնտակտավորներից 7-ի մոտ և սննդամթերքի 4 նմուշներից 2-ում հայտնաբերվել է միևնույն «Շիգելա Զոնե» տեսակի հարուցիչը:

«Այսպիսով, Սյունիքի մարզի Գորիս քաղաքի թիվ 3 հիմնական դպրոցի 1-4-րդ դասարանների աշակերտների մոտ գրանցված աղիքային վարակիչ հիվանդության՝ շիգելոզի (դիզենտերիա), առաջացման պատճառը նշված դասարանների աշակերտներին տրված սննդամթերքի երկրորդային աղտոտումն է: Դպրոցում իրականացվել են հակահամաճարակային միջոցառումներ, այդ թվում՝ ախտահանում: Հիվանդների բուժումը շարունակվում է, նրանց վիճակը գնահատվում է բավարար, նոր հիվանդներ չկան»,-նշվում է ՀՀ առողջապահության նախարարության և ՀՀ ԳՆ Սննդամթերքի անվտանգության պետական ծառայության համատեղ տարածած հաղորդագրությունում:

Лента

Рекомендуем посмотреть