Թուրքիայի կենտրոնական ընտրական հանձնաժողովը հրապարակել է հունիսի 23-ին երկրի խոշորագույն քաղաքի՝ Ստամբուլի քաղաքապետի կրկնակի ընտրությունների նախնական արդյունքները, համաձայն որոնց՝ Ստամբուլի քաղաքապետ է ընտրվել Ընդդիմադիր «Ժողովրդահանրապետական» (CHP-ԺՀԿ) կուսակցության թեկնածու Էքրեմ Իմամօղլուն՝ ստանալով 4 մլն 741.868 ձայն, կամ՝ քվեների 54.21 տոկոսը:
Իսկ իշխող «Արդարություն և զարգացում» (AKP-ԱԶԿ) կուսակցության թեկնածու Բինալի Յըլդըրըմը ստացել է 3 մլն 935.453 ձայն, կամ՝ քվեների 44.9 տոկոսը:
«Մեկ մարդու իշխանությունն այլևս տապալված է: Այս գիշեր բոլորս միասին շուրջպար կբռնենք: Վաղը բոլորս ի գործ՝ միասնաբար կառուցելու ժողովրդավարություն»,-անդրադառնալով Ստամբուլի քաղաքապետի ընտրությունների արդյունքներին՝ ֆեյսբուքյան իր էջում գրել է Թուրքիայի ընդդիմադիր քրդամետ «Ժողովուրդների դեմոկրատական կուսակցության» (ԺԴԿ-HDP) հայ պատգամավոր Կարո Փայլանը։
Նշենք՝ Թուրքիայի նախագահ Ռեջեփ Թայիփ Էրդողանը շնորհավորել է Ստամբուլի քաղաքապետի ընտրություններում հաղթած ընդդիմադիր թեկնածուին:
«Ցանկանում եմ, որ ընտրության արդյունքները Ստամբուլին բարիք բերեն։ Այսօր մեկ անգամ ևս դրսևորվեց ազգային կամքը։ Շնորհավորում եմ նախնական տվյալներով հաղթած Էքրեմ Իմամօղլուին»,-գրել է Էրդողանը՝ թվիթերյան մոկրոբլոգում։
İstanbul Büyükşehir Belediye Başkanlığı yenileme seçimi sonuçlarının İstanbul'umuz için hayırlara vesile olmasını diliyorum. Milli irade bugün bir kez daha tecelli etmiştir. Gayrı resmi sonuçlara göre seçimi kazanan Ekrem İmamoğlu'nu tebrik ediyorum.
— Recep Tayyip Erdoğan (@RTErdogan) June 23, 2019
Այդպիսով, ինչպես նկատում է «Էրմենիհաբեր»-ը, Էքրեմ Իմամօղլուն դարձավ վերջին 35 տարում տեղի ունեցած քաղաքապետի 8 ընտրություններում տոկոսային հարաբերակցությամբ ամենից շատ՝ 50 տոկոսից ավելի, ձայներ հավաքած քաղաքապետը:
Ստամբուլում 10 մլն 570.354 ընտրելու իրավունք ունեցող քաղաքացուց նախօրեին կայացած ընտրությանը մասնակցել է 8 մլն 925.063-ը: Վավեր ճանաչված քվեների քանակը կազմել է 8.746.464, 178.599-ը՝ անվավեր է եղել։
Պատրաստեց՝ Լիաննա Մարգարյանը