Онлайн

Դաշնակցությունը Արցախի նախագահի թեկնածու կառաջադրի

2019-07-08 17:15 , Политика, 101

Դաշնակցությունը Արցախի նախագահի թեկնածու կառաջադրի

Հայ Յեղափոխական Դաշնակցության (ՀՅԴ) Արցախի կազմակերպության շրջանային ժողովը հայտարարում է, որ մասնակցելու է Արցախի նախագահական և խորհրդարանական ընտրություններին և նախագահի թեկնածու առաջադրելու նպատակով հատուկ նիստ է հրավիրելու։

Կուսակցության տարածած հայտարությունը՝ ստորև․

«ՀՅԴ Արցախի կազմակերպության բարձրագույն ժողովը, քննելով և վերլուծելով Արցախում տիրող կացությունը և առաջիկա ՏԻՄ, նախագահական և խորհրդարանական ընտրություններում Դաշնակցության դիրքորոշումները, արձանագրելով, որ որոշ քաղաքական ուժերի և առանձին գործիչների կողմից վաղաժամկետ սկսած նախագահական ընտրությունների նախապատրաստման գործընթացը և սահմանադրական իրավակարգավորումներին հակասող փաստացի քարոզարշավը հասարակության ծայրաստիճան բևեռացման պատճառ է դարձել, ինչին նպաստել է նաև իշխանության կողմից երկրում արմատական բարեփոխումների գործընթացի անհետևողականությունը.

Հաշվի առնելով, որ.

Հայաստանի Հանրապետության իշխանությունների հետ հարաբերություններում առաջացած մտահոգիչ լարվածությունը,

Բանակցային գործընթացում առկա մարտահրավերներն ու վտանգները և այդ առումով Արցախի սուբյեկտայնության բարձրացման հրամայականը,

Արցախի հիմնախնդրի համահայկական նշանակությունը հայ ժողովրդի պահանջատիրության և նպատակների իրականացման գործում,

Հաստատում է, որ՝

Նոր սահմանադրական կարգով իրականացվող առաջին համապետական ընտրությունները վճռորոշ դեր են ունենալու Արցախի Հանրապետության ներքին կյանքում և արտաքին հարաբերություններում,

Ընտրությունները պետք է մեկ անգամ ևս վերահաստատեն էլ ավելի հզորացված, ավելի ժողովրդավարական և սոցիալական պետություն կառուցելու ժողովրդի կամքը,

Քաղաքական որևէ գործընթաց չպետք է խաթարի ժողովրդի միասնականությունը:

ՀՅԴ Արցախի կազմակերպության Շրջանային ժողովը համոզված է, որ Արցախի առաջընթացի երաշխիքը ազատ, արդար և թափանցիկ ընտրությունների արդյունքում ազգային օրակարգով առաջնորդվող իշխանության ձևավորումն է:

Այդպիսի օրակարգով առաջնորդվող իշխանության պետական ուղեգիծը պետք է հիմնված լինի «Զարգանալ՝ չզիջելով» գաղափարի վրա, ապահովելով.

Արցախի Հանրապետության Սահմանադրությամբ ամրագրված տարածքային ամբողջականության վերականգնումը,

Հայաստան-Արցախ ռազմավարական դաշինքի՝ իրավապայմանագրային հիմքի վրա ամրապնդումը,

Սոցիալական արդարության, մարդու իրավունքների պահպանության և օրենքի գերակայության վրա հիմնված ներազգային համերաշխության ապահովումը,

Զսպումների և հակակշիռների մեխանիզմների ներդրմամբ պետական համակարգի հավասարակշռման, անմիջական ժողովրդավարության ընդլայնմանն ու ամրապնդմանն ուղղված՝ Արցախի Հանրապետության նոր Սահմանադրության ընդունումը,

Վերաբնակեցման համակարգված, լայնածավալ ու հետևողական իրականացումը:

Քննելով առաջիկա համապետական ընտրությունների հարցը՝ ՀՅԴ Արցախի կազմակերպության բարձրագույն ժողովը որոշեց.

Մասնակցել ԱՀ նախագահական և խորհրդարանական ընտրություններին,

Հանձնարարել նորընտիր Կենտրոնական կոմիտեին՝ բազմակողմանի բանակցություններ սկսել ազգային միասնական օրակարգի հիման վրա նախագահի համաձայնեցված թեկնածու առաջադրելու շուրջ,

Բանակցությունների արդյունքների հիման վրա աշնանը հրավիրել Արտակարգ ժողով՝ ՀՅ Դաշնակցության կողմից ԱՀ նախագահի թեկնածու առաջադրելու օրակարգով»:

Лента

Рекомендуем посмотреть