Ամերիկայի Միացյալ Նահանգների պետդեպարտամենտը հայտարարությամբ կոչ է արել երկրի քաղաքացիներին զերծ մնալ Թուրքիայի որոշ նահանգներ այցելելուց։ Որպես հիմնավորում նշվել են ահաբեկչական գործողությունների վտանգը և կամայական ձերբակալությունները։
«Էրմենիհաբեր»-ը հղում անելով հայտարարությանը գրում է, որ ահաբեկչության սպառնալիքի առումով հատկապես վտանգավոր են որակվել Իրաքի և Սիրիայի հետ սահմանակից թուրքական նահանգները՝ Բաթմանը, Բինգյոլը, Դիարբեքիրը, Գազիանթեփը, Հաքքարին, Հաթայը, Քիլիսը, Մարդինը, Շանլըուրֆան, Սիիրթը, Շըրնաքը, Թունջելին և Վանը։
Պետդեպարտամենտը զգուշացրել է, որ նշված նահանգներում ահաբեկիչները կարող են թիրախավորել առավելապես մարդաշատ վայրերն ու օբյեկտները՝ զվարճանքի և առևտրի կենտրոնները, տեղական պետական մարմինների շենքերը, հյուրանոցները, ակումբները, ռեստորանները, աղոթատեղիները, զբոսայգիները, սպորտային և մշակութային միջոցառումների անցկացման վայրերը, կրթական հաստատությունների շենքերը, օդանավակայանները։
ԱՄՆ քաղաքացիները զգուշացվել են նաև, որ, մասնավորապես, սոցցանցերում Թուրքիայի իշխանություններին ուղղված քննադատական գրառումների հեղինակները ևս կարող են ձերբակալվել։