Ազգային ժողովում այսօր անցկացված փակ, գաղտնի քվեարկությամբ Արթուր Դավթյանը նշանակվեց Հայաստանի գլխավոր դատախազ:
Հաշվիչ հանձնաժողովի հրապարակած արդյունքներով՝ քվեարկությանը մասնակցել են 103 պատգամավորներ, որոնցից Դավթյանի նշանակմանը կողմ են քվեարկել 97-ը, դեմ՝ 3-ը, 3 քվեաթերթիկ ճանաչվել է անվավեր:
Քվեարկությանը, ինչպես երեկ հայտարարել էին, չեն մասնակցել «Բարգավաճ Հայաստան» խմբակցությունը և Հայ ազգային կոնգրես խմբակցության ղեկավար կազմը:
Ծնունդով հոռոմցի 37-ամյա Արթուր Դավթյանը ավարտել է Երեւանի պետական համալսարանը (ԵՊՀ), նույն բուհի ասպիրանտուրան, իրավաբանական գիտությունների թեկնածու է, արդարադատության առաջին դասի խորհրդական:
Գլխավոր դատախազությունում Դավթյանը սկսել է աշխատել դեռեւս 2006 թվականին, վերջին երեք տարիներին եղել է Երեւանի դատախազ, իսկ այս տարվա հունիսին նախագահ Սերժ Սարգսյանի հրամանով նշանակվել է գլխավոր դատախազի տեղակալի պաշտոնում։