Գագիկ Խաչատրյանի փաստաբանները՝ «ում բռնում են հիվանդանում է» ձևակերպման և իրենց պաշտպանյալի իրավունքների խախտման մասին - RadioVan.fm

Онлайн

Գագիկ Խաչատրյանի փաստաբանները՝ «ում բռնում են հիվանդանում է» ձևակերպման և իրենց պաշտպանյալի իրավունքների խախտման մասին

2020-02-05 14:20 , Право, 314

Գագիկ Խաչատրյանի փաստաբանները՝ «ում բռնում են հիվանդանում է» ձևակերպման և իրենց պաշտպանյալի իրավունքների խախտման մասին

Պաշտոնեական դիրքի չարաշահման և խոշոր չափերի վատնման մեղադրանքով կալանքի տակ գտնվող Ֆինանսների նախկին նախարար, Պետական Եկամուտների կոմիտեի (ՊԵԿ) նախկին նախագահ Գագիկ Խաչատրյանի գործով պետական իրավասու մարմինների կողմից խախտվում է անձի Եվրոպական կոնվենցիայի 3-րդ հոդվածով սահմանված իրավունքը։

Այդ մասին հայտարարում են Խաչատրյանների փաստաբանական խմբից։

«Իմ պաշտպանյալը պնդում է, որ ես առողջական խնդիրների թեման չհանրայնացնեմ, սակայն այսօր ծայրահեղ խնդրի առաջ ենք կանգնած։ Քրեակատարողական հիմնարկում Խաչատրյանին այցից հետո մասնագետներն արձանագրել են բժշկական օգնության անհրաժեշտություն, որից հետո հունվարի 15-ին` իմ պաշտպանյալը տեղափոխվել է «Աստղիկ» ԲԿ։ Հունվարի 22-ին բժշկական կոնսիլիումը՝ բարձրակարգ մասնագետների ներգրավմամբ, տվել է հստակ ցուցում՝ Խաչատրյանին ստացիոնար բժշկական պայմաններում բուժելու վերաբերյալ։ Բնականաբար պետության առաջին պարտավորությունը պիտի լիներ բուժման պայմաններն ապահովվելը, սակայն հենց նույն օրը, երբ իմացան, որ Գագիկ Խաչատրյանը բժշկական վերահսկողության կարիք ունի, տեղափոխեցին քրեակատարողական հիմնարկ»,-նիստի ավարտից լրագրողների հետ ճեպազրույցում ասել է Խաչատրյանների փաստաբանական խմբի անդամ Երեմ Սարգսյանը։

Նա տեղեկացրել է, որ նշված դեպքից հետո իրենք դիմել են բոլոր իրավասու մարմիններին (քրեակատարողական ծառայություն, արդարադատության նախարարության համապատասխան գերատեսչություն, գլխավոր դատախազություն)` պահանջելով, որ ապօրինությունը դադարեցվի, և Գագիկ Խաչատրյանը իրացնի իր իրավունքը՝ տեղափոխվելով բժշկական կենտրոն սեփական միջոցների հաշվին։ Փաստաբանը նշել է, որ հակառակ դեպքում ստիպված կլինեն առավել ծայրահեղ քայլերի դիմել, սակայն հուսով են, որ համապատասխան մարմինները ամեն դեպքում կպահեն ողջամտությունը։

«Հիմա տարբեր անձանց շրջանակում քննարկումներ է լինելու՝ «ում բռնում են հիվանդանում է և այլն» ձևակերպումներով։ Բայց եկեք ֆիքսենք մի քանի կարևոր հանգամանքներ. նախ Գագիկ Խաչատրյանը 2015թ.-ից սկսած 3 անգամ վիրահատության է տարել Գերմանիայում։ 2018թ.-ին վիրահատությունից հետո հետվիրահատական բուժումը կիսատ թողնելով ժամանել է Հայաստան՝ որևէ կերպ չփորձելով թաքնվել քննությունից։ Երկրորդը՝ տարիքը հաշվի առնենք. 64 տարեկան է ու վերջին 6 ամսում քրեակատարողական հիմնարկում գտնվելու ընթացքում զրկված է եղել որևէ բուժում ստանալու հնարավորությունից, միայն ցավազրկող է ստացել։ Հիմա հարց է առաջանում. պետական մարմինները ի՞նչ շահ ունեն անձի իրավունքները այսպես կոպիտ ոտնահարելու։ Պետությունը յուրաքանչյուր քաղաքացու համար առողջության պահպանման պարտավորություն ունի։ Մասնագետները տվել են եզրակացություն, որ եթե Խաչատրյանի բուժումը չիրականացվի, ծայրահեղ ծանր հետևանքներ կարող են առաջանալ… Անդառնալի հետևանքը նշում եմ, այլևս չեմ ցանկանում մասնավորեցնել»,-ասել է պաշտպանը։

Երեմ Սարգսյանը տեղեկացրել է, որ Խաչատյանի հարազատներն ու ընկերներն արտերկրից, անհանգստացած լինելով առողջականով, կապ են հաստատել և պատրաստակամություն հայտնել ենթադրյալ վնասի ամբողջական փոխհատուցում կազմակերպելու, մինչև որ քննությունը ավարտվի ու պարզվեն հանգամանքները։ Նա նշել է, որ եթե ցանկություն լինի կոնկրետ աղբյուրներն էլ կերևան, թե ովքեր են այդ անձինք և արդյոք ունեն նման հնարավորություններ, թե ոչ։

Նա նաև հիշեցրել է, որ փոխհատուցման ապահովման առաջարկն ու գրավի միջնորդությունը ներկայացնում են հիմնավոր կասկածի բացակայության պայմաններում։ Պաշտպանական կողմը պնդում է, որ առաջադրված մեղադրանքները հիմնավոր կասկածի շեմը չի հաղթահվել, այսինքն՝ ներկայացված ապացույցները չեն հիմնավորում, թե արդյոք նշված ենթադրյալ հանցանքը կատարվել է, և Գագիկ Խաչատրյանը դրա հետ կապ ունի, թե ոչ։ Ավելին, հիմնական մեղադրանքը այն է, որ պատճառվել է վնաս ոչ թե անձնական օգուտ ստանալու նպատակով, այլ պաշտոնական գործունեության ընթացքում ոչ նպատակային կամ ճիշտ ծախսերի կատարման հետևանքով, որը հանգեցրել է պետական միջոցների վատնման։ Նման մեղադրանքով, տեսականորեն, կարելի է ներգրավվել ցանկացած նախկին պաշտոնյայի։

«Արդեն 6 ամիս է՝ Գագիկ Խաչատրյանը կալանքի տակ է, նախաքննական մարմինը միշտ նույն հիմնավորումն է բերում՝ ասելով, թե Գագիկ Խաչատրյանը, մնալով ազատության մեջ, կարող է թաքնվել վարույթն իրականացնող մարմնից, կարող է խոչընդոտել գործի քննությանը։ Բայց դրա համար չկան բավարար ապացույցեր, այլ կա ճիշտ հակառակը. Գագիկ Խաչատրյանը, ազատության մեջ լինելով, մշտապես պատշաճ վարքագիծ է դրսևորել»,- եզրափակել է Երեմ Սարգսյանը։

Երեկ ուշ երեկոյան Վերաքննիչ դատարանը, դատավոր Սերգեյ Մարաբյանի նախագահությամբ, քննել է Գագիկ Խաչատրյանի կալանքը երկարացնելու դեմ փաստաբանների բողոքը, որի վերաբերյալ որոշումը կհրապարակվի վաղը՝ փետրվարի 6-ին, ժ. 11:00-ին:

Նշենք՝ Հայաստանի Հանրապետության ազգային անվտանգության ծառայության քննչական դեպարտամենտում դեռևս 2019 թվականի փետրվարի 2-ին հարուցված քրեական գործի շրջանակներում տևական ժամանակ ձեռնարկված լայնածավալ օպերատիվ-հետախուզական միջոցառումների և քննչական գործողությունների արդյունքում ձեռք բերված փաստական տվյալների հիման վրա, 2019 թվականի օգոստոսի 27-ին Գագիկ Խաչատրյանի, ինչպես նաև վերջինիս հետ փոխկապակցված մի շարք անձանց առանձնատներում և բնակարաններում կատարված խուզարկությունների արդյունքում ՀՀ ֆինանսական կառույցի երկարամյա նախկին ղեկավարը նույն օրը ձերբակալվել է։

Մեղադրանքի դրվագներից մեկով՝ նախկին պաշտոնյայի ղեկավարած կառույցում գրանցվել են աշխատակիցներ, որոնց աշխատավարձ է փոխանցվել, սակայն իրականում աշխատանքի չեն հաճախել:

Лента

Рекомендуем посмотреть