Онлайн
ՀՀ Ազգային ժողովի «Բարգավաճ Հայաստան» խմբակցության ղեկավար Գագիկ Ծառուկյանն առաջարկում է կորոնավիրուսի համաճարակի պատճառով հարկադիր պարապուրդի մատնված օրավարձով աշխատող քաղաքացիներին ֆինանսական աջակցություն տրամադրել:
Այդ մասին Ծառուկյանն ասել է այսօր հրավիրված քաղաքական խորհրդի նիստում՝ նշելով, որ Հայաստանում 5000-7000 դրամ օրավարձով աշխատող 200 հազար ընտանիք կա, որոնց պետք է ամսական 70 հազար դրամ գումար տրամադրել:
Ծառուկյանն անդրադարձել է նաև քաղաքացիների ունեցած վարկային պարտավորություններին:
«Բանկային համակարգում պետք է լինի ոչ թե սառեցում, այլ ներում՝ 3 ամիս։ 1 մլն 650 հազար վարկառու կա, մարդը չի աշխատում, չգիտի՝ ոնց սնվի, ու այդ մարդուն պարտադիր 2 ամիս հետո տոկոսները գալու են։ Պետք է որոշում կայացվի և տոկոսները սառեցվեն, որ գոնե մարդը մտածի իր առօրյա սննդի հարցով։ Թե չէ՝ ասում են անհատական հանդիպումներ, ծիծաղելի է, 1 մլն 650 հազար մարդ անհատական հանդիպումնե՞ր»,- ասել է Գագիկ Ծառուկյանը, ով դժգոհ է նաև կորոնավիրուսի տարածումը կանխելու և դրա հետևանքները վերացնելու ուղղությամբ կառավարության ձեռնարկած միջոցառումներից:
«Բարգավաճ Հայաստան» խմբակցության անդամների առաջարկությունների հիման վրա արձանագրություն է կազմվել, որը կներկայացվի գործադիր և օրենսդիր մարմիններին:
Գագիկ Ծառուկյանի գլխավորությամբ անցկացված քննարկման մանրամասները՝ տեսանյութում:
