Онлайн
Չնայած փաստին, որ այսօր Ազգային ժողովի արտահերթ նիստում չընդունվեց կորոնավիրուսով վարակված անձանց կոնտակտավորներին գտնելու նպատակով հեռախոսազանգերը ֆիքսելու նախագիծերի փաթեթը, այդուհանդերձ, կառավարության մշակած այդ նախագծերի՝ առաջին և երկրորդ ընթերցմամբ քննարկումները կրկին կազմակերպելու նպատակով Ազգային ժողովի նախագահի որոշմամբ՝ այսօր՝ ժամը 17:00-ին, գումարվեց Ազգային ժողովի արտահերթ նիստ։
Ըստ այդմ՝ պատգամավորներին առաջին ընթերցմամբ ներկայացվեց «Արտակարգ դրության իրավական ռեժիմի մասին» Հայաստանի Հանրապետության օրենքում լրացումներ կատարելու մասին և «Էլեկտրոնային հաղորդակցության մասին» Հայաստան Հանրապետության օրենքում լրացում կատարելու մասին օրենքների նախագծերի փաթեթը, որը առաջին ընթերցմամբ ընդունվեց՝ ընդդիմադիր պատգամավորների բացակայության պայաններում․ իշխանական պատգամավորներից 69-ը կողմ քվեարկեց, մեկը՝ ձեռնպահ։
Ազգային ժողովի նախագահ Արարատ Միրզոյանը բոլոր՝ 3 խմբակցություններին տեղեկացրեց, որ կորոնավիրուսով պայմանավորված արտակարգ դրության պայմաններում մարդկանց հեռախոսազանգերին հետևելուև կոնկրետ գտնվելու վայրը տեղորոշելու վերաբերյալ օրենսդրական փաթեթի երկրորդ ընթերցումը կկազմակերպվի 21.30-ին՝ հորդորելով նրանց գտնվել խորհրդարանի նիստերի դահլիճում։
«Բարգավաճ Հայաստան» խմբակցության պատգամավոր Նաիրա Զոհրաբյանը ֆեյսբուքյան գրառմամբ նշել է, որ չեն գնալու ու քվերակությանը չեն մասնակցելու։
«Այս պահին ԱԺ-ում, առանց ընդդիմադիր երկու խմբակցություններին իրազեկելու, սկսվել է արտահերթ նիստ, որի օրակարգում այսօր առավոտյան տապալված` ՀՀ քաղաքացիներին տեղորոշելու անընդունելի նախագիծն է: Նիստը ընդմիջվել է քվորումի բացակայության պատճառով և միայն նիստի մեկնարկին է ԱԺ նախագահը իրազեկել, որ գանք նիստի:
Բնականաբար, «Իմ Քայլի» ուժերով նիստը կկայանա, հպարտ քաղաքացիներին տեղորոշելու անիմաստ նախագիծը կընդունվի, սակայն սա վատ, շատ վատ նախադեպ է:
Այսպես չի կարելի, պարզապես չի կարելի:
Սա քաղաքական բարեվարքության և գործընկերային համակեցության նորմերի կոպտագույն խախտում է:
Այս նախագիծը ոչ միայն չի նպաստելու պանդեմիայի դեմ պայքարին, այլ տանելու է հսկայական ռեսուրսներ, որ կարող էին ուղղվել սովի մեջ հայտնված հազավոր ընտանիքների հացի խնդրի լուծմանը:
Ես տեղեկացնում եմ, որ «Բարգավաճ Հայաստանը» չի գնալու և չի մասնակցելու այս նիստին երկու պատճատով. առաջին` նիստի մասին իմացել ենք պոստ-ֆակտում և երկրորդ` մեզ տեղորոշելու նախագիծը այնքան կապ ունի կորոնավիրուսի կանխարգելման հետ, ինչքան ես բրիտանական արքունիքի հետ»,-գրելէ նա:
