ԼՂ հակամարտությանը մասնակցելու նպատակով Ուկրաինայի քաղաքացիների հավաքագրելու լուրը Ուկրաինայում պաշտոնապես հերքել են - RadioVan.fm

Онлайн

ԼՂ հակամարտությանը մասնակցելու նպատակով Ուկրաինայի քաղաքացիների հավաքագրելու լուրը Ուկրաինայում պաշտոնապես հերքել են

2020-07-28 14:43 , Политика, 813

ԼՂ հակամարտությանը մասնակցելու նպատակով Ուկրաինայի քաղաքացիների հավաքագրելու լուրը Ուկրաինայում պաշտոնապես հերքել են

Ուկրաինայում ՀՀ դեսպան Տիգրան Սեյրանյանը Ուկրաինայի արտաքին գործերի նախարարությունում հանդիպում է ունեցել նախարարի տեղակալ Վասիլ Բոդնարի հետ։

Նախօրեին կայացած հանդիպմանը Հայաստանի դեսպանը զրուցակցին վերստին ներկայացրել է Ադրբեջանի գործողությունների արդյունքում հուլիսի 12-ից հայ-ադրբեջանական սահմանի հյուսիս-արևելյան հատվածում իրադրության լարվածության վերաբերյալ ամփոփ տեղեկատվությունը և կարևորել իրադարձությունների նկատմամբ միջազգային հանրության հավասարակշռված մոտեցումը։

«Ուկրաինացի բարձրաստիճան դիվանագետը շնորհակալություն է հայտնել դեսպան Սեյրանյանին՝ Ուկրաինայի հայ համայնքին ուղղված զսպվածություն ցուցաբերելու և սադրանքների չտրվելու հորդոր պարունակող ուղերձի համար: Նա հավելել է, որ տարբեր ազգությունների ներկայացուցիչներ խաղաղորեն ապրում են Ուկրաինայում և «այսօր խիստ անհրաժեշտ է ապահովել ազգամիջյան խաղաղության պահպանումը և կանխել հայկական ու ադրբեջանական համայնքների միջև առճակատումը»:

Դեսպանը հաղորդել է զրուցակցին, որ լարվածության հենց սկզբից Ուկրաինայի հայ համայնքը զսպվածություն է դրսևորել, ՈւՀՄ նախագահը և Ուկրաինայում ՀԱԵ հոգևոր առաջնորդը համապատասխան ուղերձներով դիմել են հայրենակիցներին:

Կողմերը քննարկել են երկկողմ օրակարգի արդի հարցեր, ինչպես նաև պայմանավորվել ջանքեր գործադրել տնտեսական հարցերով հայ-ուկրաինական համատեղ միջկառավարական հանձնաժողովի նիստը նախապատրաստելու ուղղությամբ։

Զրույցի ընթացքում փոխնախարար Վասիլ Բոդնարը պաշտոնապես հերքեց վերջին օրերին տարբեր ԶԼՄ-ների կողմից տիրաժավորվող տեղեկատվությունն առ այն, թե Ուկրաինայում հավաքագրում են Ուկրաինայի քաղաքացիներին` մասնակցելու Լեռնային Ղարաբաղի (ԼՂ) հակամարտությանը»,-տեղեկանում ենք Ուկրաինայում Հայաստանի դեսպանության ֆեյսբուքյան պաշտոնական էջի հրապարակումից:

Հիշեցնենք՝ Ուկրաինայի արտգործնախարարությունն ավելի վաղ մտահոգություն էր հայտնել հայ-ադրբեջանական սահմանին լարվածության առնչությամբ, որի արդյունքում, ըստ գերատեսչության, «հրետանային հրետակոծումներ են տեղի ունեցել 2020 թվականի հուլիսի 12-ին՝ Թովուզի ուղղությամբ»։ Ուկրաինայի արտաքին քաղաքական գերատեսչությունը նաև ընդգծել էր, որ հանդես է գալիս իրավիճակի քաղաքական կարգավորման օգտին՝ «միջազգայնորեն ճանաչված սահմաններում Ադրբեջանի ինքնիշխանությունը և տարածքային ամբողջականությունը հարգելու հիման վրա»:

Այս հայտարարության առնչությամբ Հայաստանում Ուկրաինայի դեսպանը հրավիրվել էր ՀՀ արտաքին գործերի նախարարություն։

«Ուկրաինա, մի´ աջակցիր ագրեսորին»՝ այս կոչով էլ դաշնակցական երիտասարդները բողոքի ակցիա իրականացրին Երևանում Ուկրաինայի դեսպանատան դիմաց։

Պատրաստեց՝ Լիաննա Մարգարյանը

Лента

Рекомендуем посмотреть