Հայաստանում Սևրի հաշտության պայմանագրի հարյուրամյակի հիշատակման առնչությամբ Թուրքիայի արտաքին գործերի նախարարության (ԱԳՆ) հայտարարությունը մեկ անգամ ևս ի ցույց է դնում «այդ երկրի անկարողությունը` առերեսվելու իր անցյալի հետ»։
Այդ մասին հայտարարել է Հայաստանի ԱԳՆ խոսնակ Աննա Նաղդալյանը՝ անդրադառնալով Թուրքիայի արտաքին գործերի նախարարության՝ Սևրի պայմանագրի 100-ամյակի առիթով Հայաստանի իշխանությունների հայտարարություններին առնչությամբ արձագանքին։
Նշենք Թուրքիան հայտարարել էր, թե «թուրք ժողովուրդը պատռել է Սևրը և նետել պատմության աղբամանը»։ Նշվել էր, թե «1920թ-ի օգոստոսի 10-ին կնքված Սևրի պայմանագիրը, որը Առաջին համաշխարհային պատերազմի վերջին ուղղված էր ոչնչացնելու իրենց հայրենիքի անկախությունն ու ինքնիշխանությունը, հանդիսանում է մի փաստաթուղթ, որում բացահայտվեցին ներխուժման պլանները»։
Ըստ Հայաստանի արտգործնախարարության խոսնակի` զարմանքի է արժանի, որ Թուրքիայի ներկա կառավարությունը, որը «առիթը բաց չի թողնում արժևորելու Օսմանյան ժառանգությունը՝ այդօրինակ նյարդային արձագանք է ցուցաբերում նույն Օսմանյան կայսրության կողմից մի շարք պետությունների, այդ թվում` Հայաստանի Հանրապետության հետ կնքված Սևրի պայմանագրի հիշատակումից»:
Աննա Նաղդալյանը շեշտում է` Սևրի հաշտության պայմանագիրը եղել է, կա և շարունակելու է մնալ պատմական փաստ, որը հնարավոր չէ վերախմբագրել կամ ջնջել: Միայն այդ քաղաքականության վերանայումը և Թուրքիայի կողմից անցյալի հետ առերեսվելու կարողությունը, նրա համոզմամբ, ճանապարհ կհարթեն մեր տարածաշրջանի ժողովուրդների միջև իրական հաշտության համար։