Աշխարհի 215 երկրում նոր կորոնավիրուսային հիվանդությամբ (Covid-19) վարակվածների ընդհանուր թիվն այս պահին մոտենում է 20 մլն 553 հազարին, որից մահացել է 746 640-ը, ապաքինվել՝ շուրջ 13 մլն 465 հազար մարդ։
Ըստ worldometers միջազգային պորտալի՝ վարակվածության բարձր ցուցանիշներով առաջին տեղում շարունակում է մնալ Ամերիկայի Միացյալ Նահանգները, որին հաջորդում են Բրազիլիան, Հնդկաստանը, Ռուսաստանը։
Ի դեպ, միայն վերջին մեկ օրում աշխարհում գրանցված 1725 մահերից 129-ը բաժին է հասնում Ռուսաստանին։
Ավելի քան 145 մլն 941 հազար բնակչություն ունեցող այս երկրում մահվան դեպքերն արդեն 15 260-ի է հասել, հիվանդությունը հաստատվել է 902 701 մարդու մոտ, որից 710 298-ը ապաքինվել են։
Հիշեցնենք՝ Ռուսաստանում երեկ գրանցվեց կորոնավիրուսի դեմ պայքարում աշխարհում առաջին պատվաստանյութը։ Այն մշակվել է Ռուսաստանի Դաշնության առողջապահության նախարարության Ն.Ֆ. Գամալեի անվան համաճարակաբանության և մանրէաբանության ազգային հետազոտական կենտրոնում։ Մարդու ադենովիրուսի վրա հիմնված վեկտորային պատվաստանյութը փորձարկվել է մի քանի կենդանական տեսակների, իսկ ավելի ուշ՝ կամավորների երկու խմբի վրա:
Կորոնավիրուսի դեմ պատվաստանյութի առաջին խմբաքանակը կթողարկվի երկու շաբաթից։ Ինչպես հայտարարել է երկրի նախագահ Վլադիմիր Պուտինը՝ պատվաստման գործընթացը կամավորության սկզկբունքով է լինելու:
Պատրաստեց՝ Լիաննա Մարգարյանը