ՌԴ բանտում գտնվող հայաստանցի վարորդը կտեղափոխվի քաղաքացիական հիվանդանոց

Ավելի քան երկու տարի ռուսաստանյան բանտում գտնվող Հրաչյա Հարությունյանը Ռուսաստանի մարդու իրավունքների հանձնակատարի միջնորդությամբ կտեղափոխվի քաղաքացիական բժշկական հաստատություն. Հայաստանի օմբուդսմենի և Ռուսաստանի մարդու իրավունքների հանձնակատարի հաստատությունների միջև համագործակցության համաձայնագրի շրջանակներում Ռուսաստանի հանձնակատարի ներկայացուցիչները հատուկ այցելություն են կատարել ազատությունից զրկման այն վայր, որտեղ պատիժ է կրում Հայաստանի քաղաքացի Հրաչյա Հարությունյանը, ուսումնասիրվել են նրա պատժի կրման պայմաններն ու առողջական վիճակը: Հայաստանի մարդու իրավունքների պաշտպանի աշխատակազմի փոխանցմամբ՝ Հարությունյանի բժշկական փաստաթղթերի ուսումնասիրությունից պարզվել է, որ նա գտնվում է բժշկական հսկողության ներքո: Ներկայումս նրա առողջական վիճակը բուժաշխատողները գնահատել են բավարար: Այցի ընթացքում Հրաչյա Հարությունյանը հանձնակատարի ներկայացուցիչներին գանգատվել է մեջքի շրջանում ցավերից: Դրա հիման վրա ազատությունից զրկման վայրի բժշկական ղեկավարության հետ համաձայնություն է ձեռք բերվել առ այն, որ 2017 թվականի հունվար-փետրվար ամիսներին քաղաքացիական բժշկական հաստատությունում կկազմակերպվեն Հարությունյանին անհրաժեշտ հետազոտությունները և համապատասխան բուժումը:

Ռուսաստանի մարդու իրավունքների հանձնակատար Տատյանա Մոսկալկովան պատասխան նամակով տեղեկացրել է նաև, որ Հրաչյա Հարությունյանի իրավունքների պահպանման հարցը վերցված է հատուկ հսկողության:

Հիշեցնենք, ՀՀ քաղաքացի Հրաչյա Հարությունյանը Տրոիցկի շրջանի դատարանի վճռով 2014-ի օգոստոսին դատապարտվեց 6 տարի 9 ամսվա ազատազրկման: Նրա վարած բեռնատարը մերձմոսկովյան Պոդոլսկ քաղաքի մոտակայքում շրջվել և բախվել էր ավտոբուսին: Ճանապարհատրանսպորտային պատահարի հետևանքով 18 մարդ էր զոհվել, տասնյակ մարդիկ՝ վիրավորվել։ Ըստ քննության՝ Հարությունյանի վարած բեռնատարը պատշաճ ձևով չի սպասարկվել, արգելակները սարքին չեն եղել, ինչի մասին նա պարտավոր էր իմանալ։