Онлайн
Ադրբեջանը նախատեսում է դիմել ՄԱԿ-ի կրթության, գիտության և մշակութային կազմակերպությանը՝ ՅՈՒՆԵՍԿՕ-ին, Ղարաբաղի մշակութային ժառանգության վերականգնման հարցով։
Այդ մասին ՏԱՍՍ լրատվական գործակալության հետ զրույցում հայտարարել է Ադրբեջանի մշակույթի նախարար Անար Քերիմովը:
Նա ասել է, թե Ադրբեջանը քննարկում է Շուշի քաղաքը և Խուդաֆերինի կամուրջները ՅՈՒՆԵՍԿՕ-ի Համաշխարհային ժառանգության ցուցակում ընդգրկելու հնարավորությունը:
«Մենք անկեղծորեն համարում ենք, որ այս հեռանկարը շատ լավ է, քանի որ այս երկու վայրերը պատմության, մշակույթի և ճարտարապետության լավագույն օրինակներից են»,-ընդգծել է նա՝ հավելելով, որ իրենց ազգային փորձագետները միաձայն պնդում են, որ Համաշխարհային ժառանգության ցուցակում ընդգրկվելու համար դրանք համապատասխանում են ՅՈՒՆԵՍԿՕ-ի բոլոր չափանիշներին:
Անդրադառնալով Դադիվանքի վանական համալիրին, որը ներկայում գտնվում է ռուս խաղաղապահների հսկողության ներքո, Ադրբեջանի կառավարության ներկայացուցիչը վերահաստատել է՝ այս հնագույն եկեղեցին հասանելի կլինի բոլոր համայնքների ուխտավորների համար:
«Եւ՛ հայ համայնքը, և՛ ադրբեջանական համայնքը հասանելիություն կունենան»,- հավաստիացրել է Քերիմովը:
Նշենք՝ Ադրբեջանի մշակույթի նախարարն ավելի վաղ հայտարարել է, թե Լեռնային Ղարաբաղում գտնվող պատմական և մշակութային հուշարձանները կպահպանվեն և հասանելի կլինեն բոլոր, այդ թվում՝ հայկական համայնքի համար։
Ադրբեջանում Ռուսաստանի Դաշնության (ՌԴ) դեսպան Միխայիլ Բոչարնիկովն էլ վստահեցրել է, որ Բաքուն կկարողանա ապահովել Ղարաբաղում իր վերահսկողության տակ անցած քրիստոնեական սրբությունների անվտանգությունը։
