Տրանս-Ադրիատիկ խողովակաշարով (TAP) արտահանվող ադրբեջանական գազը հասել է Իտալիա: Այդ մասին Twitter-ի պաշտոնական էջում տեղադրված հայտարարությամբ տեղեկացնում է Թուրքիայի արտաքին գործերի նախարարությունը (ԱԳՆ)։
«Այսպիսով, հարավային գազային միջանցքը գործարկվել է։ Եվրոպայի էներգետիկ անվտանգությանն ուղղված հարցերում Թուրքիայի մասնակցությամբ նոր էջ է բացվել»,-ասված է Թուրքիայի դիվանագիտական գերատեսչության հրապարակման մեջ։
TAP is now in service and Azerbaijan gas has reached Italy. Southern Gas Corridor has become operational. A new chapter has been opened in Turkey’s contribution to energy supply security of the rest of Europe. pic.twitter.com/dPac3Yur9u
— Turkish MFA (@MFATurkey) January 8, 2021
Նշենք՝ TAP խողովակաշարի կառուցումը տևել էր ավելի քան չորս տարի՝ ավարտվելով 2019-ի աշնանը։ Այս խողովակաշարով Կասպից ծովի ադրբեջանական հատվածում գտնվող Շահ-Դենիզ հանքավայրում արդյունահանված գազը արտահանվում է եվրոպական շուկա, մասնավորապես, մի շարք իտալական բնակավայրեր: Նոր գազատարը շարունակությունն է Տրանս-Անատոլիական (TANAP) գազատարի, որը Ադրբեջանից Վրաստանի ու Թուրքիայի տարածքով հասել է Հունաստանի սահմանին: Ադրիատիկ ծովի հատակով Իտալիա հասած նոր գազատարի ամբողջ ուղին՝ Ադրբեջանից Իտալիա, անվանվում է Հարավային միջանցք։
2021 թվականի հունվարի 1-ին հայտնի դարձավ, որ մեկնարկել է Տրանս-Ադրիատիկ գազամուղի միջոցով, որի զգալի մասն անցնում է Թուրքիայի տարածքով, դեպի Եվրոպա ադրբեջանական գազի արտահանումը:
«Պատմության ընթացքում առաջին անգամ Ադրբեջանին հաջողվել է իր բնական գազը արտահանել եվրոպական շուկա գազամուղով»,-պաշտոնական հաղորդագրությունը տարածել էր Trend գործակալությունը
TAP-ի բաժնետերերի թվում են ադրբեջանական պետական նավթային ընկերությունը՝ SOCAR-ը, բրիտանական British Petrolum՝ BP ընկերությունը: