Հայությունը հաստատակամ է՝ կասեցնելու հայ ժողովրդին ցեղասպանության ենթարկելու բոլոր սպառնալիքները. ԱԺ նախագահ - RadioVan.fm

Онлайн

Հայությունը հաստատակամ է՝ կասեցնելու հայ ժողովրդին ցեղասպանության ենթարկելու բոլոր սպառնալիքները. ԱԺ նախագահ

2021-01-13 18:23 , Политика, 240

Հայությունը հաստատակամ է՝ կասեցնելու հայ ժողովրդին ցեղասպանության ենթարկելու բոլոր սպառնալիքները. ԱԺ նախագահ

ՀՀ Ազգային ժողովի (ԱԺ) նախագահ Արարատ Միրզոյանը Բաքվում հայերի ջարդերի 31-րդ տարելիցի կապակցությամբ ուղերձ է հղել, որում ասված է․

«1990 թվականի հունվարին Ադրբեջանի մայրաքաղաք Բաքվում տեղի հայ բնակչությունը ենթարկվեց համակարգված և զանգվածային կոտորածի։

Կիրովաբադում, Սումգայիթում, Բաքվում տեղի ունեցած ջարդերը մաս դարձան ադրբեջանական պետական հայատյացության և էթնիկ զտումների քաղաքականության։ Հակահայ այս քաղաքականությունը շարունակվեց Արցախյան 2-րդ պատերազմի ընթացքում, որն ուղեկցվեց Արցախի խաղաղ բնակչության դեմ իրականացված բազմաթիվ զարհուրելի ոճիրներով։

Անկախ այս բարդագույն իրավիճակից և ստացած հարվածներից՝ համայն հայությունը հաստատակամ է՝ շարունակելու ապրել և արարել իր հայրենիքում և կասեցնելու հայ ժողովրդին ցեղասպանության ենթարկելու բոլոր սպառնալիքները։ Մեր հայրենիքում այլ տարբերակ, քան մեր ապրելու իրավունքի հետ հաշվի նստելն է, ուղղակի գոյություն ունենալ չի կարող։

Առավել դիպուկ, քան Սարոյանն է ձևակերպել, կարծում եմ՝ հնարավոր չէ ասել

«Կուզեի տեսնել աշխարհում որևէ ուժ, որ կկործանի այս ժողովրդին, անկարևոր մարդկանց այս փոքր ցեղը, որի պատմությունն ավարտված է, պատերազմները՝ կռված ու պարտված, շինությունները՝ փլուզված, գրականությունը՝ չկարդացված, երաժշտությունը՝ չլսված, և աղոթքները՝ լռած։ Դե գործի անցեք, կործանե՛ք այս ցեղը։ Պատկերացրեք, որ նորից 1915-ն է, իսկ աշխարհում՝ պատերազմ։ Կործանե՛ք Հայաստանը։ Տեսեք՝ կհաջողվի՞։ Հանեք նրանց տներից, ուղարկեք անապատները: Թողեք առանց հաց ու ջրի: Հրդեհեք տներն ու եկեղեցիները։ Տեսեք՝ նորից չե՞ն ապրի: Տեսեք, նորից չե՞ն խնդա։ Տեսեք՝ նրանց ցեղը չի՞ հառնի, երբ քսան տարի հետո երկու հոգի հանդիպեն գարեջրատանն ու ծիծաղեն ու խոսեն իրենց լեզվով։ Դե՛, տեսեք՝ մի բան կկարողանա՞ք անել դրա հետ։ Տեսեք՝ կկարողանա՞ք արգելել, որ նրանք ծաղրեն աշխարհի մեծ-մեծ գաղափարները, շա՛ն տղերք, որ երկու հայ խոսեն աշխարհում, դե՛, փորձե՛ք կործանել նրանց»»։

Նշենք՝ ՀՀ արտաքին գործերի նախարարությունն (ԱԳՆ) Բաքվի հակահայկական ջարդերի 31-րդ տարելիցի կապակցությամբ հրապարակած հաղորդագրությունում արձանագրել է, որ Ադրբեջանը շարունակում է հայաթափման այդ քաղաքականությունն Արցախի նկատմամբ։

Лента

Рекомендуем посмотреть