Онлайн
Հաշվի առնելով երեկ Ջաջուռ գյուղում նորածնի մահվան դեպքի հասարակական մեծ հնչեղությունը՝ ՀՀ քննչական կոմիտեն այսօր նորածնի մահվան հանգամանքների վերաբերյալ հաղորդագրություն է տարածել:
Նշենք՝ երեկ լրատվական հոսքերը ողողվեցին լուրով, որ Ջաջուռ գյուղում ապրող Բաղդասարյանների արտաքնոցում մոտ 8 ամսական երեխայի դի է հայտնաբերվել՝ տոպրակի մեջ: Նորածինը ընտանիքի 4-րդ երեխան է եղել՝ իգական սեռի:
Անմիջապես դեպքի վայր մեկնած քննչական-օպերատիվ խումբը բացատրություններ է վերցրել կնոջից, սկեսուրից, ամուսնուց, բուժաշխատողներից։
Քննչական կոմիտեից հաղորդում են, որ «Հղիության 8-րդ ամսում գտնվող 30-ամյա կինը որովայնի և աճուկային հատվածներում ունեցել է ցավեր, սկսել են հոսել պտղաջրերը, իրենց տանից վերցրել է պոլիէթիլային տոպրակ, այն դրել է պլաստմասե թասի մեջ, որպեսզի պտղաջրերը լցվեն թասի մեջ, այնուհետև ցանկություն է առաջացել բնական կարիքները հոգալու և գնացել է արտաքնոց, որը գտնվում է դրսում: Արտաքնոցում զգացել է, որ իրենից ինչ-որ կշիռ պոկվել-ընկել է։ Հասկանալով, որ ծննդաբերել է՝ անմիջապես այդ մասին հայտնել է հարազատներին, զանգահարել են շտապօգնություն և նրան անմիջապես տեղափոխել բժշկական կենտրոն: Դեպքի վայրի զննությամբ արտաքնոցի անցքում՝ 2 մետր խորության վրա, հայտնաբերվել է իգական սեռի պտղի դիակ՝ պոլիէթիլային տոպրակի վրա ընկած»:
«Պարզաբանում ենք, որ «Երեխան «պոլիէթիլային տոպրակի մեջ փաթեթավորված» չի եղել»,-ընդգծում են քննչականից:
Կնոջ բացատրություններում մատնանշված հանգամանքներն ստուգելու ուղղությամբ ՀՀ քննչական կոմիտեի Շիրակի մարզային քննչական վարչության Ախուրյանի քննչական բաժնում ձեռնարկվում են անհրաժեշտ միջոցներ:
