Տարեսկզբից մշակված նոր կարգի համաձայն՝ հումանիտար բեռների ստացման և բացթողնման փաստաթղթերին կցվում են նաև լուսանկարներն ու տեսանյութերը:
Նոր կարգի մասին հայտնում են ՀՀ արտակարգ իրավիճակների նախարարությունից (ԱԻՆ)՝ ընդգծելով, որ հսկում են աշխատանքների ամբողջ ընթացքը, նախարարությունում ստեղծվել է գործընթացը համակարգող հանձնաժողով:
Նշվում է, որ բեռների բաշխումը հասցեատերերին շարունակվում է իրականացվել համայնքապետարանների միջոցով՝ պաշտպանության և առողջապահության նախարարությունների հետ ակտիվ համագործակցությամբ։
ԱԻՆ-ից միաժամանակ տեղեկացնում են, որ պատերազմից հետո արտերկրից բեռներ են ուղարկվում ոչ միայն Արցախում բնակվողների և ժամանակավորապես Հայաստանում գտնվող արցախցի ընտանիքների, այլ նաև կամավորական տարբեր ջոկատներով մարտական գործողություններին մասնակցած անձանց համար:
Ընդգծվում է՝ ԱԻՆ-ը հոգում է նաև բեռների՝ դեպի մարզեր տեղափոխման հարցը՝ գերատեսչության տրանսպորտային միջոցներով:
Հիշեցնենք՝ 2020-ի պատերազմի օրերից թիկունքից սահման՝ Արցախ, հումանիտար օգնությունը հասցվում էր ԱԻՆ-ի համակարգմամբ։