Ապրիլյան պատերազմի մասնակիցների ուսման վարձերը կզեղչվեն ևւս 20 տոկոսով

2016թ. ապրիլյան պատերազմի ժամանակահատվածում միայն մարտական հերթապահության մեջ ընդգրկված զինծառայողները, որոնք մարտական գործողություններին չեն մասնակցել և արդեն զորացրվել են, ՀՀ բուհերում սովորելիս կարող են օգտվել լրացուցիչ 20 տոկոս զեղչից։ Այդ մասին համաձայնությունը ձեռք է բերվել ՀՀ պաշտպանության նախարարության և Հայաստանի երիտասարդական հիմնադրամի միջև:

Կողմերի միջև պայմանավորվածության համաձայն՝ զեղչի գումարը կհատկացվի Հայաստանի երիտասարդական հիմնադրամի կողմից, ինչը կգումարվի սահմանված 30 տոկոս զեղչին՝ ընդհանուր կազմելով 50 տոկոս։

Հայաստանի երիտասարդական հիմնադրամից վստահեցնում են, որ այդպիսով կլուծվի որոշ զինծառայողների զինգրքույկներում կատարված գրանցումների մասնավոր սխալների հարցը, ինչպես նաև մարտական հերթապահության և մարտական գործողությունների հետ կապված տարբերությունների խնդիրները։