Հարկային տեսուչները չեն հեռանա տոնավաճառներից. առևտրականներին հորդորել են աշխատել օրենքի շրջանակում

Կառավարության շենքի առջև այսօր տևական ժամանակ բողոքի ակցիա իրականացնող հայաստանյան տոնավաճառների աշխատակիցներին այդպես էլ չի հաջողվել հանդիպել վարչապետի հետ: Նրանք, ի վերջո, համաձայնել են հանդիպել վարչապետի՝ հարկային խնդիրները համակարգող օգնական Հայկ Զոհրաբյանի հետ: Շուրջ 1,5 ժամ տեւած հանդիպումից հետո հանդիպմանը մասնակցած առևտրականներից մեկը լրագրողներին հայտնել է, որ իրենց հորդորվել է աշխատել օրենքի շրջանակում՝ հարկերը վճարել, աշխատակիցներին գրանցել, գնորդներին էլ, անպայման, ՀԴՄ կտրոններ տրամադրել: Ցուցարարներին առաջարկվել է նաև 10-15 հոգանոց աշխատանքային խումբ կազմել, առաջարկներ ներկայացնել, որոնք էլ կքննարկվեն վարչապետ Կարեն Կարապետյանի հետ:

Հարկային մարմինների աշխատակիցների այցերը տոնավաճառներ դադարեցնելու վերաբերյալ առևտրականների պահանջը, սակայն, չի ընդունվել:

Ինչպես այսօր ավելի վաղ հայտնել էինք՝ Առինջ-մոլ, Փեթակ և Սուրմալու տոնավաճառների մեծաթիվ աշխատողներ վաղ առավոտից «Հանգի’ստ թողեք մեզ» վանկարկումներով բողոքի ակցիա էին իրականացնում կառավարության շենքի առջև՝ պահանջելով հանդիպում վարչապետ Կարեն Կարապետյանի հետ։ Առևտրականները նշում են, որ արդեն երեք օր է հարկային մարմինները ստուգումներ են իրականացնում իրենց տոնավաճառներում՝ պահանջելով առևտրի շրջանառությունը փաստաթղթավորել, ինչի հնարավորությունը՝ նշում են ՝ ֆինանսական ռեսուրսների առումով իրենք այս պահին չունեն։