Онлайн
Թուրքիայի նախագահ Ռեջեփ Թայիփ Էրդողանի մասնակցությամբ այսօր առավոտյան Ստամբուլում մեկնարկած Ռուսաստանի և Ուկրաինայի պատվիրակությունների երկօրյա բանակցությունների առաջին օրն ավարտվել է։
Այդ մասին հայտնում է թուրքական «Անադոլու» պետական լրատվական գործակալությունը, որն ավելի վաղ տեղեկացրել էր, որ Ստամբուլում բանակցություններ անցկացնելու շուրջ պայմանավորվածությունը ձեռք է բերվել Թուրքիայի և Ռուսաստանի Դաշնության նախագահներ Ռեջեփ Թայիփ Էրդողանի և Վլադիմիր Պուտինի հեռախոսազրույցի ընթացքում։
Ուկրաինայի բանակցային խմբի ղեկավար Դավիթ Արախամիան հնչեցրել է Կիևի պայմանները անվտանգության երաշխիքների վերաբերյալ։
Նրա խոսքով՝ 8 երկիր, այդ թվում՝ Թուրքիան, կարող են հանդես գալ որպես Ուկրաինայի անվտանգության երաշխավոր։
«Ուկրաինան ցանկանում է որպես երաշխավոր տեսնել ՄԱԿ-ի Անվտանգության խորհրդի երկրներին, այդ թվում՝ Մեծ Բրիտանիային, Չինաստանին, ԱՄՆ-ին, Ֆրանսիային, Թուրքիային, Գերմանիային, Լեհաստանին և Իսրայելին: Մյուս երկրները նույնպես կկարողանան միանալ պայմանագրին, եթե ցանկանան»,-Արախամիայի խոսքերն է մեջբերում «Անադոլու»-ն։
Ըստ գործակալության՝ ուկրաինական պատվիրակության անդամ Ալեքսանդր Չալինն էլ իր հերթին նշել է, որ Ուկրաինան պատրաստ է չեզոքության, եթե համաձայնեցվի խաղաղության պայմանագիր։
Ստամբուլում ուկրաինական պատվիրակության հետ բանակցություններից հետո ռուսական պատվիրակության ղեկավար Վլադիմիր Մեդինսկին լրագրողների հետ զրույցում ասել է, որ Ռուսաստանը Ուկրաինայում հակամարտությունը թուլացնելու համար երկու քայլ է ձեռնարկում։
«Քայլերից մեկը վերաբերում է ռազմական ասպեկտին, որի մասին կբարձրաձայնի պաշտպանության փոխնախարարը, իսկ երկրորդը՝ քաղաքականին, որի մասին ես կխոսեմշմ»,-«Ինտերֆաքս» գործակալության փոխանցմամբ՝ ասել է ռուսական պատվիրակության ղեկավարը՝ հավելելով, որ Ստամբուլում ուկրաինական կողմից հստակ ձևակերպված դիրքորոշում և առաջարկներ են ստացել, որոնք կուսումնասիրվեն և կներկայացվեն երկրի ղեկավարության ուշադրությանը։
Հավելենք՝ «Դոլմաբախչե» պալատում բանակցությունների մեկնարկին Էրդողանը համառոտ խոսքով դիմել է մասնակիցներին՝ նշելով, որ Թուրքիան «խորապես անհանգստացած Է» Ուկրաինայի շուրջ ստեղծված իրադրությամբ և հրադադարի կոչ է անում: Նա հույս է հայտնել, որ բանակցությունները կնպաստեն Ռուսաստանի և Ուկրաինայի նախագահների անձնական հանդիպման անցկացմանը, ու որ՝ Թուրքիան պատրաստ է իր տարածքը տրամադրել այդ հանդիպմանը։
Բացի այդ, կայացել է երկու երկրների պատվիրակությունների ղեկավարների հանդիպումը։
Սպասվում է, որ ստամբուլյան բանակցությունները տեղի կունենան նաև վաղը:
