Փաշինյանն ու Գրոսին կարևորել են միջուկային անվտանգության ապահովման ոլորտում համագործակցությունը - RadioVan.fm

Онлайн

Փաշինյանն ու Գրոսին կարևորել են միջուկային անվտանգության ապահովման ոլորտում համագործակցությունը

2022-10-04 17:19 , Политика, 597

Փաշինյանն ու Գրոսին կարևորել են միջուկային անվտանգության ապահովման ոլորտում համագործակցությունը

Հայաստանը կարևորում է ՀՀ կառավարության և ԱԷՄԳ միջև համագործակցությունը, որն էական նշանակություն ունի Հայաստանի էներգետիկ և միջուկային անվտանգության ապահովման և կարողությունները զարգացնելու տեսանկյունից. Ատոմային էներգետիկայի միջազգային գործակալության (ԱԷՄԳ) գլխավոր տնօրեն Ռաֆայել Մարիանո Գրոսիի հետ հանդիպմանն ասել է վարչապետ Նիկոլ Փաշինյանը՝ ընդգծելով, որ այս խնդիրները կառավարության ռազմավարական առաջնահերթությունների թվում են:

Վարչապետի պաշտոնական կայքի հաղորդմամբ՝ Գրոսին ևս ընդգծել է միջուկային անվտանգության ապահովման ոլորտում համագործակցության կարևորությունը և պատրաստակամություն հայտնել շարունակել օժանդակությունը Հայաստանի կառավարությանն այդ ուղղությամբ:

Փաշինյանն ու Գրոսին անդրադարձել են Հայկական ատոմային էլեկտրակայանի անվտանգության մակարդակի բարձրացման ուղղությամբ աշխատանքներին, մտքեր փոխանակել Հայաստանի և ԱԷՄԳ-ի միջև համագործակցության խորացման հնարավորությունների շուրջ:

Ավելի ուշ նրան ընդունել է ՀՀ արտաքին գործերի (ԱԳ) նախարար Արարատ Միրզոյանը: Արտգործնախարարության պաշտոնական կայքի հաղորդմամբ՝ վերջինս Գրոսիի հետ քննարկել է տարածաշրջանային անվտանգությանը վերաբերող մի շարք հարցեր:

Ըստ ԱԳՆ-ի՝ նրանք արձանագրել են, որ Հայաստան-ԱԷՄԳ ծավալուն օրակարգն իր մեջ ներառում է ինչպես միջուկային անվտանգության և էներգետիկայի, այնպես էլ՝ շրջակա միջավայրի, առողջապահության, արտակարգ իրավիճակների և այլ բնագավառներ:

Նշենք՝ ԱԷՄԳի գլխավոր տնօրենն այսօր է ժամանել Երևան՝ Հայաստանի արտգործնախարար Արարատ Միրզոյանի հրավերով։ Ըստ Հայաստանի արտաքին քաղաքական գերատեսչության՝ Գրոսիին կընդունեն նաև Հայաստանի նախագահ Վահագն Խաչատուրյանը, տարածքային կառավարման և ենթակառուցվածքների նախարար Գնել Սանոսյանը, առողջապահության նախարար Անահիտ Ավանեսյանը։

Մարիանո Գրոսին կայցելի նաև Հայկական ատոմային էլեկտրակայան, Ֆանարջյանի անվան ուռուցքաբանության ազգային կենտրոն, ինչպես նաև դասախոսությամբ հանդես կգա ԵՊՀ ուսանողների համար։

Лента

Рекомендуем посмотреть