Եվրամիության դիտորդների խումբը ժամանել է Երևան. Տոյվո Կլաար

Հարավային Կովկասի և Վրաստանում ճգնաժամի հարցերով Եվրոպական միության (ԵՄ) հատուկ ներկայացուցիչ Տոյվո Կլաարը տեղեկացրել է, որ այսօր Երևան է ժամանում Միության դիտորդների նախնական խումբը։

«Եվրամության անդամ 27 երկրներն արագ են արձագանքել Հայաստանի խնդրանքին։ Տեղակայման նպատակը լինելու է իրավիճակի մշտադիտարկումը և տեղում Հայաստանին ու Ադրբեջանին աջակցության տրամադրումը՝ կայունացման նպատակով»,-Twitter-ում գրել է Կլաարը:

Today advance team of monitors arrives in Yerevan. The 27 Member States have acted rapidly to respond to request. The aim of the deployment will be to monitor the situation and support stabilisation on the ground. pic.twitter.com/xE53xfLTUo
— Toivo Klaar (@ToivoKlaar) October 14, 2022

Նշենք՝ Եվրամիության դեսպանները Քաղաքական և անվտանգության հանձնաժողովի հոկտեմբերի 11-ի փակ նիստում էին համաձայնել Հայաստան ուղարկել քաղաքացիական առաքելություն, որը պետք է տեղակայվի Ադրբեջանի հետ սահմանի երկայնքով՝ վստահություն կառուցելու և սահմանային հանձնաժողովներին աջակցելու նպատակով։

Հիշեցնենք՝ Հայաստան ԵՄ քաղաքացիական առաքելություն ուղարկելու մասին պայմանավորվածությունը ձեռք էր բերվել Պրահայում՝ հոկտեմբերի 6-ին Հայաստանի, Ադրբեջանի, Ֆրանսիայի ու Եվրոպական խորհրդի ղեկավարների՝ ժամեր շարունակված բանակցությունների արդյունքում։

Հանդիպման արդյունքներով ընդունված քառակողմ հայտարարությամբ Հայաստանն իր համաձայնությունն է հայտնել՝ աջակցելու ԵՄ քաղաքացիական առաքելությանը Ադրբեջանի հետ սահմանի երկայնքով: Ադրբեջանը համաձայնել է համագործակցել նշյալ առաքելության հետ այնքանով, որքանով որ առնչություն կունենա: Առաքելությունն իր աշխատանքները կսկսի հոկտեմբերին, առավելագույնը երկու ամիս ժամկետով:

Հայաստանի արտաքին գործերի փոխնախարար Պարույր Հովհաննիսյանը երեկ՝ հոկտեմբերի 13-ին, հայտնել էր, որ Եվոպական միությունը Հայաստան կգործուղի տեխնիկական խումբ, որը պետք է հստակեցնի Ադրբեջանի հետ սահմանին դիտորդական առաքելության տեղակայման վայրերը: