«Հայ-վրացական հարաբերություններում առկա պոզիտիվ մթնոլորտը կվերածենք շատ ավելի մեծ արդյունքների տնտեսական ոլորտում, քաղաքական հարաբերությունների և մյուս ոլորտներում»,-այդ մասին այսօր հայտարարել է պաշտոնական այցով Վրաստանում գտնվող Հայաստանի վարչապետ Նիկոլ Փաշինյանը՝Վրաստանի վարչապետ Գիորգի Կվիրիկաշվիլիի հետ համատեղ ասուլիսում:
Փաշինյանն ընդգծել է, որ հայ-վրացական հարաբերությունները շատ խորն են և դրանք ունեն քաղաքական, պատմական, մարդկային, մշակութային կոնտեքստ, և այս հարաբերությունները պետք է հետագայում ավելի զարգանան և ավելի խորանան: Վարչապետն ընդգծել է՝ Վրաստանում է կոնկրետ հեռանկարներ բացելու և կոնկրետ խնդիրներ լուծելու համար: Նա համոզմունք է հայտնել, որ կլինեն լրջագույն և նոր զարգացումներ և այդ նոր զարգացումները կբխեն Հայաստանի և Վրաստանի շահերից:
Վարչապետ Նիկոլ Փաշինյանը, նշենք, Վրաստան է մեկնել այսօր՝ երկօրյա պաշտոնական այցով:
Վարչապետի գլխավորած կառավարական պատվիրակությանը Թբիլիսիի միջազգային օդանավակայանում դիմավորել է Վրաստանի փոխվարչապետ, արտաքին գործերի նախարար Միխեիլ Ջանելիձեն:
Այնուհետ ՀՀ վարչապետի գլխավորած պատվիրակությունն ուղևորվել է Վրաստանի կառավարություն, որտեղ տեղի է ունեցել Նիկոլ Փաշինյանի և Վրաստանի վարչապետ Գիորգի Կվիրիկաշվիլիի առանձնազրույցն ու պատվիրակությունների ընդլայնված կազմով հանդիպումը:
Այցի շրջանակներում վարչապետը կհանդիպի նաև Թբիլիսիի հայ համայնքի ներկայացուցիչների հետ և կայցելի Հովհաննես Թումանյանի տուն-գիտական, մշակութային կենտրոն: Նախատեսվում է նաև այց Ջավախք, Նինոցմինդա ու Ախալքալաք: