Հայաստանի կառավարական պատվիրակության այցը Վրաստան արդեն արդյունքներ է արձանագրում, մասնավորապես, կրթական ոլորտում. հայ ուսանողների համար Թբիլիսիի պետական համալսարանում կսահմանվեն հատուկ տեղեր:
ՀՀ կրթական գերատեսչությունից հայտնում են, որ կրթության և գիտության նախարար Արայիկ Հարությունյանը և փոխնախարար Արևիկ Անափիոսյանը հանդիպել են Իվանե Ջավախիշվիլիի անվան Թբիլիսիի պետական համալսարանի ռեկտոր Գեորգի Շարվաշիձեին։ Հանդիպման ընթացքում քննարկվել են երկու պետությունների միջև բարձրագույն կրթության ոլորտում համագործակցության առկա վիճակի և հնարավորությունների վերաբերյալ հարցեր։
Քննարկվել են նաև միջազգային և փոխանակումների ոլորտում համագործակցության մի շարք հնարավորություններ, մասնավորապես, ռեկտորը նշել է, որ Թբիլիսիի պետական համալսարանը հնարավորություն ունի վերջերս միջազգային գործընկերների աջակցությամբ ներդրված ֆիզիկայի մագիստրատուրայի և մաթեմատիկայի PhD-ի շրջանակներում հայ ուսանողների համար հատուկ տեղեր սահմանել։
Նշենք, որ ՀՀ վարչապետ Նիկոլ Փաշինյանի գլխավորած պատվիրակությունը երկօրյա այցով Վրաստան է մեկնել մայիսի 30-ին: