Գարեգին Բ-ի հրաժարականը պահանջողները դիմում են վարչապետին - RadioVan.fm

Онлайн

Գարեգին Բ-ի հրաժարականը պահանջողները դիմում են վարչապետին

2018-06-19 18:25 , Общество, 1550

Գարեգին Բ-ի հրաժարականը պահանջողները դիմում են վարչապետին

«Նոր Հայաստան, նոր Հայրապետ» նախաձեռնությունը բաց նամակ է հղել վարչապետ Նիկոլ Փաշինյանին, որում մասնավորապես ասված է.

«Նոր Հայաստան նոր Հայրապետ» նախաձեռնությունը շարժում է սկսել կաթողիկոս Գարեգին Բ-ի դեմ` պահանջելով նրա հրաժարականը` հիմք ընդունելով կաթողիկոսի` հայոց եկեղեցու Նվիրապետության սրբազան ուխտի և կանոնների դրժումն ու ոտնահարումն իր ողջ պատճառահետևանքային կապերով, ազգային հարստության (պատմամշակութային արժեքներ) մսխումը, քրեաօլիգարխիկ տարրերին սատարելը և նրանց հետ գործակցելը, ազգի համար կարևոր և եղերական իրադարձություններին չարձագանքելը, անհիմն կարգալուծությունները, եկեղեցիների և տարաբնույթ շինարարական աշխատանքներում ներգրավված շինարարներին և կազմակերպություններին հասանելիք գումարների յուրացումը, եկեղեցու ներսում որոշ հոգևորականների անբարտավան կեցվածքին և անօրինական գործողություններին, քրիստոնեական արժեքների անկմանը, տարաբնույթ աղանդավորական շարժումների աշխուժացմանը նպաստելը, սփյուռքը սոսկ ֆինանսական աղբյուր և սեփական նկրտումներին ծառայող քսակ դիտարկելը և այլն:

Այս ամենի հանգուցալուծումը տեսնում ենք միմիայն կաթողիկոսի հրաժարականով, որի համար «Նոր Հայաստան նոր Հայրապետ» շարժումը պահանջում է հրավիրել եպիսկոպոսական կամ ներկայացուցչական ժողով` մասնակիցների ամբողջական կազմով:

Մայր Աթոռը, օգտագործելով ԶԼՄ-ի դեռևս կախյալ վիճակը որոշ ուժերից, որոնց հովանավորն է ներկայիս կաթողիկոսը, օգտագործում է հակաքարոզչական գործիքակազմը` անհիմն կերպով տարբեր հոգևորականների միջոցով խեղաթյուրելով շարժման նպատակը: Քանի որ ինքնապաշտպանության նպատակով Մայր Աթոռի տեղեկատվական համակարգը առանց հիմնավորման շարժումը որակում է որպես աղանդավորական, պաշտոնապես հայտարարում ենք, որ շարժումը կրում է հայոց եկեղեցու բարեկարգմանն ուղղված քաղաքական, սոցիալ-մշակութային բնույթ և չի շոշափում քրիստոնեական դավանանքի և հայոց եկեղեցու վարդապետությանը դեմ քարոզչություն կամ նոր ուսմունքի տարածում, ինչը բնորոշ է աղանդավորությանը: Այսինքն` շարժումը ոչ թե դեմ է հայոց եկեղեցուն, այլ հանուն եկեղեցու բարենորոգչության է:

Պարոն վարչապետ, շնորհակալ ենք Ձեզ, որ օբյեկտիվորեն բարձրաձայնում եք որոշ ԶԼՄ-ի դեռևս կախյալ վիճակը` նրանց գործունեությունը որակելով որպես հակապետական քարոզչություն (18.06.2018):

Շարժումը, կրելով «Առողջ պետություն, առողջ եկեղեցի» գաղափարախոսությունը, կոչ է անում կառավարությանը լրջորեն վերաբերվել շարժման կողմից հրատապորեն բարձրացված հարցին, որովհետև քրեաօլիգարխիկ տարրերից պետք է մաքրել ոչ միայն պետությունը, այլև հայոց եկեղեցին` ի դեմս Գարեգին Բ կաթողիկոսի և իր կլանի: Ուստի, ակնկալում ենք պետության աջակցությունը ազգային պետական այս կարևոր գործը ցանկալի ավարտին հասցնելու համար և խնդրում ենք հետևողական լինելու ԶԼՄ-ի կողմից տեղեկատվության անաչառ լուսաբանմանը»:

Հիշեցնենք՝ հունիսի 6-ից «Նոր Հայաստան, նոր Հայրապետ» կարգախոսով Հայ առաքելական եկեղեցու մի խումբ հոգևորականներ՝ Հայաստանից և Սփյուռքից, մայրաքաղաքի Սուրբ Կաթողիկե և Սուրբ Աննա եկեղեցու բակում բողոքի հավաքներ են անցկացնում՝ պահանջելով Ամենայն Հայոց Կաթողիկոս Գարեգին Երկրորդի հրաժարականը։

«Հայաստանում տեղի ունեցած հեղափոխությունը մարմնական Հայաստանի համար էր, հիմա ժամանակն է մտածել հոգևոր Հայաստանի մասին»,-բարձրաձայնում են նախաձեռնության անդամները՝ ընդգծելով, որ հայ եկեղեցու դերակատարությունը հայ ժողովրդի կյանքում ներկայում նվազել է, չկա վստահություն և հավատ, որ այդ ամենով հանդերձ՝ կկարողանանք դիմակայել մարտահրավերներին։

Պատրաստեց՝ Լիաննա Մարգարյանը

Лента

Рекомендуем посмотреть