ՀՀ կառավարությունն այսօրվա նիստում «Թվային Հայաստան» հիմնադրամը լուծարելու մասին որոշում է կայացրել։ Հիմնադրամի լուծարման գործընթացը կազմակերպելու նպատակով կառավարության պահուստային ֆոնդից 47 մլն 280 հազար 870 դրամ գումար կհատկացվի։
Գումարից 6 մլն 123 հազար 600 դրամը կտրամադրվի հիմնադրամի գրասենյակային տարածքի վճար, 175 հազար դրամը՝ գրասենյակային և այլ ծախսերի համար, 45 մլն 105 հազար 635 դրամը՝ աշխատավարձ և այլ վճարումներ։
Որոշման որևէ հիմնավորում ներկայացված չէ։
Նշենք, որ «Թվային Հայաստան» հիմնադրամ ստեղծելու և դրա կանոնադրությունը հաստատելու մասին որոշումը կառավարությունը կայացրել է 2017-ի օգոստոսի 3-ի նիստում՝ Կարեն Կարապետյանի վարչապետության ժամանակ՝ նպատակ ունենալով բարձրացնել կառավարման արդյունավետությունը, ապահովել թափանցիկություն և բարենպաստ բիզնես միջավայր ժամանակակից տեղեկատվական տեխնոլոգիաների կիրառմամբ:
«Շատ կարևոր գործընթաց է: Մինչ այս հիմնադրամի կայանալը Ռազմավարական նախաձեռնությունների կենտրոնը նույն տեմպով պետք է շարունակի աշխատանքը, և հետո հստակ կձևակերպենք հիմնադրամի ու կենտրոնի համագործակցության բանաձևերը»,-հիմնադրմաի ստեղծան որոշումն ընդունելիս գործադիրի նիստում ընդգծել էր նախկին վարչապետ Կարեն Կարապետյանը:
Նշենք՝ մինչ այս լուծարվել է (14 սեպտեմբերի, 2018թ․) նաև Կարեն Կարապետյանի վարչապետության ժամանակ հիմնադրված «Ռազմավարական նախաձեռնությունների կենտրոն»-ը, որի ստեղծման նպատակն էր ՀՀ տնտեսական զարգացման երկարաժամկետ ռազմավարական ծրագրերի, բարեփոխումների փաթեթների և ներդրումային ծրագրերի հավաքագրումը, մշակումը, վերլուծությունը։
Պատրաստեց՝ Լիաննա Մարգարյանը