Онлайн
«Ես հիմա հիշում եմ, որ մեր տանն ինչ կա՝ լվացքի մեքենա, սառնարան, վարկով ենք առել, որովհետև շատ հարմար տարբերակով են դրանք տրամադրում։ Հարց է առաջանում՝ ինչո՞ւ միանգամից տալ 250 հազար դրամ կամ ավել գումար լվացքի մեքենա առնել, եթե կարող ես ամեն ամիս 6000 դրամ վճարելով այդ ապրանքը ձեռք բերել: Եթե չեմ սխալվում՝ մեր լվացքի մեքենայի վարկը մինչև հիմա դեռ չենք վերջացրել, մի չորս տարի առաջ ենք գնել»,-այդ մասին այսօր խորհրդարանում կառավարության ծրագրի զեկույցի ներկայացման ընթացքում ասել է վարչապետ Նիկոլ Փաշինյանը՝ արձագանքելով «Լուսավոր Հայաստան» խմբակցության պատգամավոր Մանե Թանդիլյանի հարցին, թե ինչով է վարչապետը հիմնավորում սպառողական վարկերի աճը Հայաստանում։
Համաձայնելով Փաշինյանի դիտարկմանը, որ սպառողական վարկերը շատ հարմար տարբերակով են բանկերն առաջարկում քաղաքացիներին, Ազգային ժողովի նախագահ Արարատ Միրզոյանն էլ ասել է, որ փորձել է ապառիկ պայմաններով հեռուստացույց գնել, սակայն չի հաջողվել, որովհետև պարզվել է, որ ԴԱՀԿ ծառայությունն իր հաշիվը կալանքի տակ է դրել։
«Պարզվեց չվճարված տուգանք ունեմ»,-մանրամասնել է ԱԺ նախագահը, որից հետո դահլիճում ծիծաղ է հնչել։«Լուրջ»,-գործընկերներին վստահեցրել է Միրզոյանը։
