ԱՄՆ կոնգրեսմեն Ֆրենք Փալոնեն Թուրքիայի նախագահ Ռեջեփ Թայիփ Էրդողանի` Հայոց ցեղասպանության մասին հնչեցրած խոսքերն անվանել է «զզվելի»։
«Ատելությամբ լցված այս խոսքը, որ Էրդողանն ասաց Հայոց ցեղասպանության հիշատակման օրը, պատմական փաստերի զզվելի ժխտում է»,-գրել է Փալոնեն թվիթերում՝ միաժամանակ տարածելով ՀՀ վարչապետ Նիկոլ Փաշինյանի՝ Էրդողանին ուղղված թվիթերյան գրառումը, որում Փաշինյանը կոչ է անում միջազգային հանրությանը չլռել` դա որակելով անձամբ Էրդողանի կողմից հնչեցված ծայրահեղ ատելության խոսք:
Կոնգրեսմեն Փալոնեն նաև գրել է, որ կանգնած է Նիկոլ Փաշինյանի ու հայերի հետ ամենուր՝ դատապարտելու այս դաժան ավտորիտարի կողմից նոր «անկումը»։
This hate-filled speech #Erdogan gave yesterday on the day to commemorate the #ArmenianGenocide was a disgusting denial of historical facts. I stand with @NikolPashinyan and Armenians everywhere in condemning a new low from this brutal authoritarian. https://t.co/kqPlXJlvqQ
— Rep. Frank Pallone (@FrankPallone) 25 апреля 2019 г.
Նշենք՝ ապրիլի 24-ին Էրդողանը Օսմանյան կայսրության բնակչությանն անվանել էր «հայ հրոսակներ ու նրանց աջակիցներ»՝ նրանց տեղահանումները համարելով այդ ժամանակ «ամենատրամաբանական վարքագիծ»։
Թուրքիայի նախագահի այս հայտարարությանը «Առաջին լրատվականի» հետ զրույցում անդրադարձել է նաև ՀՀ ԱԳ նախարար Զոհրաբ Մնացականյանը՝ այն համարելով դատապարտելի,վիրավորական և անընդունելի։ «Սա ոչ թե ուղղակի մերժում է, այլ, նույնիսկ, արդարացնում ցեղասպանությունը: Եվ ամենազավեշտալին այն է, որ արդարացնելով ցեղասպանությունը՝ նա փաստացի ընդունում է, որ դա եղել է կազմակերպված գործառույթ իշխանությունների կողմից: Հայերին, մեր նահատակներին, ցեղասպանության զոհերին անվանելով անընդունելի ձևով և արդարացնելով այն, ինչ որ արվել է այն ժամանակվա Օսմանյան կայսրության իշխանությունների կողմից. այս ամենն արդեն ուղղակի որևէ կերպ չի տեղավորվում որևէ շրջանակի մեջ»,-ասել է ՀՀ արտաքին գերատեսչության ղեկավարը։
Պատրաստեց՝ Լիաննա Մարգարյանը