Հայաստանում կորոնավիրուսի հաստատված դեպքերի թիվը հասավ 265-ի, 16 հոգի առողջացել է

Հայաստանում կորոնավիրուսի հաստատված դեպքերի թիվը անցած մեկ օրում աճել է 16-ով։

Առողջապահության նախարարության Հիվանդությունների վերահսկման և կանխարգելման ազգային կենտրոնի հրապարակած տվյալների համաձայն՝ մարտի 25-ի ժամը 10:00-ի դրությամբ կորոնավիրուսի հաստատված դեպքերի թիվը 265 է, որոնցից 16-ը՝ առողջացած:

Նշվում է, որ բացասական արդյունք է արձանագրվել 1315 թեստավորման դեպքում:

Հիշեցնենք՝ կորոնավիրուսի տարածմամբ պայմանավորված՝ Հայաստանի Հանրապետության ամբողջ տարածքում 2020 թվականի մարտի 16-ից, ժամը 18:30-ից սկսած մինչև 2020 թվականի ապրիլի 14-ը, ժամը 17:00-ն արտակարգ դրություն է հայտարարված:

Պարետի որոշմամբ էլ՝ այսօրվանից մինչև մարտի 31-ը, ժամը 23:59-ը ՀՀ ամբողջ տարածքում սահմանափակվելու է մարդկանց ազատ տեղաշարժվելու իրավունքը: Քաղաքացիներին կոչ է արվում տնից դուրս գալ կենսական անհրաժեշտության դեպքում, ունենալ անձը հաստատող փաստաթուղթ և պարետի կողմից հաստատված տեղաշարժման թերթիկը՝ լրացված տարբերակով:

Առողջապահության նախարարությունը կրկին կոչ է անում`

-մնացե'ք տանը,

-սահմանափակե'ք շփումները,

-հետևե'ք անձնական հիգիենային,

-հաճախակի լվացե'ք ձեռքերն օճառով` առնվազն 20 վայրկյան տևողությամբ, հատկապես սնունդ ընդունելուց առաջ և տուն մտնելուց հետո,

-հնարավորության սահմաններում նվազեցրե'ք հանրային տրանսպորտից օգտվելը,

-շփումների դեպքում պահպանե'ք առնվազն 1 մետր հեռավորություն,

-գրիպանման երևույթների առկայության դեպքում չզբաղվե'լ ինքնաբուժմամբ, տեղեկացնել բժշկին,

-եթե վերադարձել եք այնպիսի երկրներից, որտեղ համաճարակային իրավիճակը լարված է, ինքնամեկուսացե'ք 14 օր` կապ հաստատելով պոլիկլինիկայի Ձեր բժշկի հետ,

-պարբերաբար կատարեք ջերմաչափում` արդյունքների մասին տեղեկացնելով բժշկին,

-խուճապի մի' մատնվեք և հետևեք Ձեր բժշկի խորհուրդներին: