Онлайн
Ադրբեջանի արտաքին գործերի նախարարությունը (ԱԳՆ) պնդում է, թե «Հայաստանը տևական ժամանակ է՝ ապակառուցողական մոտեցում է ցուցաբերում, անհիմն մեղադրանքներ հնչեցնում, փորձում է միջամտել Ադրբեջանի ներքին գործերին»։ Բաքվի արտաքին քաղաքական գերատեսչությունը, մասնավորապես, հիշատակում է ՀՀ ԱԳՆ-ի տարածած վերջին հայտարարությունները, որոնցից մեկն առնչվում է բռնազավթված հայոց բերդաքաղաք Շուշիում մարտի 18-ին Ադրբեջանի՝ ՄԱԿ-ին անդամակցության 30-ամյակի առիթով հղած բողոքի նոտային, մյուսն էլ՝ «ադրբեջանական կողմի ակնհայտ միջամտությամբ Շուշիի մոտակայքում՝ ադրբեջանական վերահսկողության տակ գտնվող տարածքում, Հայաստանից բնական գազի մատակարարումը Լեռնային Ղարաբաղ խափանելուն»:
«Մենք Հայաստանին խորհուրդ ենք տալիս ապահովել ստանձնած պարտավորությունների կատարումը, այդ թվում՝ դուրս բերել իր զինված ուժերի մնացորդները տարածաշրջանից, և դրանով իսկ նպաստել տարածաշրջանի խաղաղությանն ու անվտանգությանը, ոչ թե հնչեցնել անհիմն և ապօրինի մեղադրանքներ»,-ադրբեջանական լրատվամիջոցների փոխանցմամբ՝ հայտարարել է ԱԳՆ մամուլի ծառայության ղեկավար Լեյլա Աբդուլլաևան։
