Մայր Աթոռն ընդունելի չի համարում Ծառուկյանի՝ Քրիստոսի արձանի տեղադրման նախաձեռնությունը՝ հորդորելով զերծ մնալ եկեղեցու ավանդույթին հակասող նախագծերից - RadioVan.fm

Онлайн

Մայր Աթոռն ընդունելի չի համարում Ծառուկյանի՝ Քրիստոսի արձանի տեղադրման նախաձեռնությունը՝ հորդորելով զերծ մնալ եկեղեցու ավանդույթին հակասող նախագծերից

2022-03-24 18:30 , Общество, 339

Մայր Աթոռն ընդունելի չի համարում Ծառուկյանի՝ Քրիստոսի արձանի տեղադրման նախաձեռնությունը՝ հորդորելով զերծ մնալ եկեղեցու ավանդույթին հակասող նախագծերից

Մարտի 23-ին Մայր Աթոռ Սուրբ Էջմիածնում գումարվել է Գերագույն հոգևոր խորհրդի հայաստանյան անդամների ժողով, որի ընթացքում ի թիվս այլ հարցերի քննարկվել է նաև Գագիկ Ծառուկյանի կողմից Հայաստանում Հիսուս Քրիստոսի արձան կառուցելու նախաձեռնությունը:

Այդ մասին հայտնում են Մայր Աթոռից՝ նշելով, որ ծրագրի առնչությամբ քննարկումներ են ունեցել Գագիկ Ծառուկյանի հետ՝ հայտնելով «պաշտամունքային, առավել ևս տերունի արձանաշինության վերաբերյալ Հայաստանյայց Առաքելական Սուրբ Եկեղեցու ավանդական մոտեցումները»:

Գերագույն հոգևոր խորհուրդը վերահաստատել է մարտի 9-ի ընդլայնված նիստում հարցի վերաբերյալ որդեգրված դիրքորոշումը՝ հանդես գալով հետևյալ հայտարարությամբ.

«Գերագույն հոգևոր խորհուրդը բարձրորեն գնահատում է տիար Գագիկ Ծառուկյանի եկեղեցաշինական անուրանալի ծառայությունները, որոնցով նա մեծապես նպաստել է Եկեղեցու հոգևոր-քարոզչական առաքելության արդյունավորմանը: Միաժամանակ Եկեղեցին ընդունելի չի համարում մեր Տիրոջ՝ Հիսուս Քրիստոսի արձանի տեղադրումը՝ նկատի առնելով, որ այն հարիր չէ Հայ Եկեղեցու դարավոր պատկերագրական և պաշտամունքային ավանդույթին։

Եկեղեցու համար ընդունելի կարող է համարվել Փրկիչ մեր Տիրոջ հարթաքանդակի կառուցումը՝ «Ամենափրկիչ» խաչքարերի սկզբունքով:

Գերագույն հոգևոր խորհրդի հորդորն է նախաձեռնության հեղինակներին և մասնակիցներին՝ զերծ մնալ Հայաստանյայց Առաքելական Սուրբ Եկեղեցու ավանդույթին հակասող նախագծերից և առաջնորդվել մեր ազգային-եկեղեցական մշակույթին, եկեղեցաբանական և աստվածաբանական սկզբունքներին համահունչ մոտեցումներով»:

Лента

Рекомендуем посмотреть