ՀՀ վարչապետի աշխատակազմին սպասարկող ավտոմեքենաների թիվը կտրուկ կկրճատվի։ Ներկայիս 50-ի փոխարեն կմնան 7-ը։ Այս մասին ֆեյսբուքյան իր էջում գրել է վարչապետի աշխատակազմի ղեկավար Էդուարդ Աղաջանյանը՝ տեղեկացնելով, որ այս պահին իրենց կցված վարորդով ծառայողական ավտոմեքենաներից օգտվում են հետևյալ պաշտոնյաները.
- ՀՀ փոխվարչապետներ,
- վարչապետի աշխատակազմի ղեկավար,
- ԱԽ քարտուղար,
- աշխատակազմի ղեկավարի տեղակալներ,
- աշխատակազմի վարչության պետեր,
- աշխատակազմին ենթակա գրասենյակների պետեր,
- վարչապետի խորհրդականներ,
- վարչապետի որոշ օգնականներ։
«Փոփոխությունների արդյունքում իրենց կցված ծառայողական ավտոմեքենաներից կօգտվեն․
- Երկու փոխվարչապետները
- ԱԽ քարտուղարը
Եվ վերջ:
Ինքս ևս կհրաժարվեմ ծառայողական ավտոմեքենայից»,-հավելել է Էդուարդ Աղաջանյանը՝ ընդգծելով, որ վարորդներն արդեն ծանուցվել են՝ ըստ օրենքի պահանջի։
Հիշեցնենք՝ ավելի վաղ վարչապետ Նիկոլ Փաշինյանը հայտարարել էր, թե պետական բյուջեից 1 մլրդ դրամ է տրամադրվում ծառայողական մեքենաների սպասարկմանը, մինչդեռ դրանք հիմնականում նախարարությունների դիմաց կանգնում և արևի տակ մաշվում են։ Ոստի «արևի տակ մաշվող» ծառայողական մեքենաների վարորդներին հավելյալ եկամտի համար կառավարությունն առաջարկել էր օնլայն տաքսի ծառայություն մատուցել։
Պատրաստեց՝ Լիաննա Մարգարյանը