Թուրքիայի նախագահ Ռեջեփ Թայիփ Էրդողանը հրահանգել է արտերկրում կազմակերպել աշխարհահռչակ պոլսահայ լուսանկարիչ Արա Գյուլերի ստեղծագործությունների ցուցադրություններ:
«Էրմենիհաբեր»-ի փոխանցմամբ՝ ցուցադրություններ են կազմակերպվելու ԱՄՆ-ի, Գերմանիայի, Անգլիայի, Իտալիայի ու Ֆրանսիայի հայտնի ցուցասրահներում: Նշվում է, որ այս պահին տեղի են ունենում կազմակերպչական և նախապատրաստական աշխատանքներ:
Հիշեցնենք՝ «Ստամբուլի աչք» անվամբ հայտնի 90-ամյա պոլսահայ լուսանկարիչը մահացել է սրտի անբավարարությունից, հոկտեմբերի 17-ին, Ստամբուլի հիվանդանոցներից մեկում:
Արա Գյուլերը, ով արժանացել է նաև «դարի լավագույն լուսանկարիչ» տիտղոսին, կյանքի 68 տարին նվիրել է լուսանկարչությանը։ Նրա արխիվում կա ավելի քան 2 մլն լուսանկար։ Նա նկարել է համաշխարհային պատմության այնպիսի հայտնի դեմքերի, որպիսիք են՝ Ուինսթոն Չերչիլը, Առնոլդ Թոյնբին, Բերթրանդ Ռասելը, Պիկասոն, Սալվադոր Դալին, Սոֆի Լորենը։ Հանրահայտ լուսանկարիչը նկարել է նաև Էրդողանին, ով նրա մահվան առիթով անձամբ զանգահարել էր նրա հարազատներին ու իր ցավակցությունները հայտնել:
Ստամբուլի փողոցներից մեկը դեռ 2017-ին անվանակոչվել է Արա Գյուլերի անվամբ։
Վերջրերս Գյուլերի 90-ամյակի առթիվ Ստամբուլում բացվել է մեծանուն արվեստագետի թանգարանը:
Պատրաստեց՝ Լիաննա Մարգարյանը